ប៉ូឡូញ ប្តេជ្ញាចិត្ត បញ្ចេញខ្ទង់ចំណាយយោធា ខ្ពស់ជាងគេបំផុត ក្នុងចំណោមសមាជិកណាតូ
បរទេស ៖ យោងតាមការ ចេញផ្សាយរបស់ RTប្រទេសប៉ូឡូញ បានប្រកាសផែនការ ដើម្បីវ៉ាដាច់សមាជិកដទៃទៀត នៅក្នុងការចំណាយយោធាជាមួយនឹង ការប្តេជ្ញាចិត្តដល់ទៅ៤,៨ភាគរយ នៃផលិតផលក្នុងស្រុកសរុប សម្រាប់វិស័យការពារជាតិ នៅឆ្នាំ២០២៦។
ការប្រកាសនេះធ្វើឡើងបន្ទាប់ពីការទាមទារម្តងហើយម្តងទៀត របស់ប្រធានាធិបតីអាមេរិក Donald Trump ដែលថាសមាជិកណាតូអឺរ៉ុប ដើរតួនាទីកាន់តែធំនៅក្នុងសន្តិសុខ របស់ពួកគេ រួមចំណែកបន្ថែមទៀត ដល់ការផ្គត់ផ្គង់អ៊ុយក្រែន និងបង្កើនថវិកាយោធារបស់ពួកគេដល់៥ភាគរយ នៃផលិតផលក្នុងស្រុកសរុប ។
កាលពីនៅក្នុងខែកក្កដា សមាជិក របស់ប្លុកនេះបានយល់ព្រមបន្តគោលដៅនៅឆ្នាំ២០៣៥ ដែលជាការផ្លាស់ប្តូរពីគោលការណ៍ ណែនាំ២ភាគរយ កាលពីយូរមកហើយនោះ។
កាលពីថ្ងៃព្រហស្បតិ៍ រដ្ឋមន្ត្រីក្រសួង ហិរញ្ញវត្ថុប៉ូឡូញ លោក Andrzej Domanski បាននិយាយថា ទីក្រុង Warsaw នឹងបែងចែកថវិកា ក្នុងទំហំកំណត់ត្រា ដល់ទៅ២០០ ពាន់លាន zlotyឬត្រូវជា៥៥ ពាន់លានដុល្លារ ដល់យោធារបស់ខ្លួន ក្រោមគម្រោងថវិកាថ្មីសម្រាប់ឆ្នាំ២០២៦។
ការបែងចែកនេះនឹងធ្វើឱ្យប្រទេសប៉ូឡូញ ក្លាយជាអ្នកចំណាយខ្ពស់បំផុត របស់ប្លុកនៅក្នុងលក្ខខណ្ឌដែលទាក់ទង លើសពីសហរដ្ឋអាមេរិក ដែលជាធម្មតាលះបង់ប្រហែល៣,២ភាគរយ នៃផលិតផលក្នុងស្រុកសរុប សម្រាប់វិស័យការពារជាតិ។ នាយករដ្ឋមន្រ្ដី Donald Tusk បាននិយាយថា ប្រទេសប៉ូឡូញត្រូវតែកសាង កងទ័ពទំនើប និងធំ ដោយមិនគិតពីការចំណាយនោះឡើយ៕
ប្រែសម្រួល៖ស៊ុនលី
