Update: លោក ថាក់ស៊ីន អតីតនាយករដ្ឋមន្ដ្រីថៃ ត្រឡប់ មកទីក្រុងបាងកកវិញ មុនការសម្រេចក្នុងសំណុំរឿង «ជាន់ទី ១៤» នៅថ្ងៃស្អែក
បរទេស ៖ អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា បានត្រឡប់មកប្រទេសថៃវិញហើយ នៅថ្ងៃចន្ទនេះ តាមយន្តហោះឯកជនរបស់លោក នៅមុនការសម្រេចរបស់តុលាការកំពូលនៅក្នុងរឿងក្តីហៅថា “ជាន់ទី១៤” ដែលគ្រោងនឹងធ្វើឡើងនៅថ្ងៃអង្គារ។
យោងតាមសារព័ត៌មាន The Nation ចេញផ្សាយនៅថ្ងៃទី៨ ខែកញ្ញា ឆ្នាំ២០២៥ បានឱ្យដឹងថា យន្តហោះឯកជនរបស់លោក ថាក់ស៊ីន ជើងហោះហើរ T7GTS ពីប្រទេសសិង្ហបុរី បានចុះចតនៅស្ថានីយឯកជន MJets នៅអាកាសយានដ្ឋានដនមឿង នៅម៉ោងប្រហែល 2.30 រសៀល។ រថយន្តចំនួនបីគ្រឿងបានចាកចេញពីអាកាសយានដ្ឋាននៅម៉ោង 3 រសៀល ទោះបីជាវាមិនច្បាស់ថារថយន្តណាដែលលោកកំពុងធ្វើដំណើរក៏ដោយ។
លោកថាក់ស៊ីនបានចាកចេញពីប្រទេសថៃ នៅល្ងាចថ្ងៃទី ៤ ខែកញ្ញា តាមយន្តហោះឯកជន Bombardier Global 7500 ដែលដំបូងឡើយបានធ្វើដំណើរ ទៅកាន់ប្រទេសសិង្ហបុរី មុនពេលបង្វែរទៅទីក្រុងឌូបៃ ប្រទេសអារ៉ាប់រួម។
មន្ត្រីអន្តោប្រវេសន៍ និងអាកាសយានដ្ឋាន បានធ្វើការត្រួតពិនិត្យយ៉ាងតឹងរ៉ឹង លើឯកសារធ្វើដំណើរ របស់គាត់មុនពេលចេញដំណើរ ដោយសារតែករណីផ្លូវច្បាប់ ដែលកំពុងបន្តរបស់គាត់ ជាពិសេសទាក់ទងនឹងការចោទប្រកាន់ មាត្រា 112 ដែលត្រូវបានទម្លាក់ចោលតាំងពីពេលនោះមក។
លិខិតឆ្លងដែនដែលត្រូវបានព្យួរកាលពីមុនរបស់គាត់ក៏ត្រូវបានដាក់ឱ្យប្រើវិញដែរដែលអនុញ្ញាតឱ្យគាត់ធ្វើដំណើរទៅបរទេស។ ទោះជាយ៉ាងណាក៏ដោយ “សំណុំរឿងជាន់ទី 14” ឬដេកមន្ទីរពេទ្យ ពេលកំពុងជាប់ឃុំ គឺកំពុងរង់ចាំនៅតែស្ថិតក្រោមការត្រួតពិនិត្យរបស់តុលាការ៕
ប្រែប្រួលៈ ណៃ តុលា
