ភរិយា របស់អតីតនាយករដ្ឋមន្រ្តីនេប៉ាល់ ស្លាប់ក្នុងភ្លើង ដោយសារក្រុមបាតុករ នាំគ្នាដុតផ្ទះអតីតនាយករដ្ឋមន្រ្តី
បរទេស៖ ប្រទេសនេប៉ាល់ ស្ថិតក្នុងភាពចលាចលក្នុងសប្តាហ៍នេះ ខណៈដែលនាយករដ្ឋមន្ត្រី KP Sharma Oli បានចុះចេញពីដំណែង បន្ទាប់ពីការតវ៉ាដ៏ហិង្សាបំផុត ដែលប្រជាជាតិមួយនេះ បានជួបប្រទះក្នុងរយៈពេលជាច្រើនទសវត្សរ៍។
បាតុកម្មនៅប្រទេសនេប៉ាល់បានប្រែក្លាយជាហិង្សានៅថ្ងៃអង្គារទី 9 ខែកញ្ញាឆ្នាំ 2025 ដែលនាំទៅដល់ការស្លាប់របស់លោកស្រី Rajyalaxmi Chitrakar ដែលជាភរិយារបស់អតីតនាយករដ្ឋមន្ត្រីនេប៉ាល់ លោក Jhalanath Khanal ។ ក្រុមបាតុករបានឡោមព័ទ្ធ និងដុតផ្ទះរបស់អតីតនាយករដ្ឋមន្រ្តីនេប៉ាល់ នៅតំបន់ Dallu នៃទីក្រុង Kathmandu ។
លោកស្រី Chitrakar ត្រូវបានបញ្ជូនទៅកាន់មន្ទីរពេទ្យ Kirtipur Burns ប៉ុន្តែមិនអាចស្រោចស្រង់ជីវិតពីរបួសបាន។ នៅថ្ងៃដដែល នាយករដ្ឋមន្ត្រី KP Sharma Oli បានប្រកាសលាលែងពីតំណែង បន្ទាប់ពីផ្ទះរបស់គាត់ផ្ទាល់ក៏ត្រូវបានដុតបំផ្លាញ។
យោតាមសារព័ត៌មាន Gulf News ចេញផ្សាយនៅថ្ងៃទី១០ ខែកញ្ញា ឆ្នាំ២០២៥ បានឱ្យដឹងថា ភាពចលាចលដែលបញ្ឆេះ ដោយការហាមប្រាមដ៏ចម្រូងចម្រាស នៅលើប្រព័ន្ធផ្សព្វផ្សាយ សង្គមបានរីករាលដាលទៅជាចលនាប្រឆាំង អំពើពុករលួយដែលដឹកនាំដោយយុវជននេប៉ាល់ ដែលទាមទារឱ្យមានសណ្តាប់ធ្នាប់នយោបាយថ្មីមួយ។
មាត្រដ្ឋាននៃការចលាចលគឺគួរឲ្យភ្ញាក់ផ្អើល យោងតាមមន្ត្រី និងប្រព័ន្ធផ្សព្វផ្សាយក្នុងស្រុកបានឱ្យដឹងថា មនុស្សយ៉ាងហោចណាស់ 22 នាក់ត្រូវបានសម្លាប់ចាប់តាំងពីថ្ងៃចន្ទនេះ ហើយរាប់រយនាក់បានរងរបួសនៅក្នុងការប៉ះទង្គិចគ្នារវាងបាតុករ និងប៉ូលីសនៅជុំវិញសភាក្នុងរដ្ឋធានី Kathmandu ។
ក្រុមអ្នកតវ៉ាបានដុតបំផ្លាញអគាររដ្ឋាភិបាល វាយលុកចូលសភា បំផ្លាញផ្ទះមេដឹកនាំនយោបាយ និងដុតទីស្នាក់ការកណ្តាលរបស់គណបក្សធំៗ។ នៅស្រុកភាគខាងលិច អ្នកទោស៩០០នាក់ បានរត់គេចពីពន្ធនាគារចំពេលមានភាពវឹកវរ។
ប្រែសម្រួលៈ ណៃ តុលា
