អឺរ៉ុប ថ្កោលទោសការវាយលុករបស់អ៊ីស្រាអែលនៅតំបន់ហ្គាហ្សា និងប្តេជ្ញាដាក់ទណ្ឌកម្ម
ព្រុចសែល៖ លោកស្រី Kaja Kallas ប្រធានគោលនយោបាយការបរទេសរបស់សហភាពអឺរ៉ុប បានថ្កោលទោសការវាយលុកដោយដីរបស់អ៊ីស្រាអែលនៅតំបន់ហ្គាហ្សាដោយព្រមានថា វានឹងធ្វើឱ្យជនស៊ីវិលរងទុក្ខវេទនាកាន់តែខ្លាំងនិងធ្វើឱ្យវិបត្តិមនុស្សធម៌ក្នុងតំបន់កាន់តែស៊ីជម្រៅ។
លោកស្រី Kallas បានសរសេរនៅលើ X ថា “ការវាយលុកលើដីរបស់អ៊ីស្រាអែលនៅហ្គាហ្សា នឹងធ្វើឱ្យស្ថានភាពអស់សង្ឃឹមកាន់តែអាក្រក់ទៅៗ” ដោយបន្ថែមថា វានឹងមានន័យថា មានការស្លាប់ ការបំផ្លិចបំផ្លាញ និងការផ្លាស់ទីលំនៅកាន់តែច្រើន។
លោកស្រីបានលេីកឡេីងថា គណៈកម្មការអឺរ៉ុបនឹងបង្ហាញវិធានការនៅថ្ងៃពុធ ក្នុងគោលបំណងដាក់សម្ពាធលើអ៊ីស្រាអែល ឱ្យផ្លាស់ប្តូរផ្លូវ រួមទាំងការផ្អាកសម្បទានពាណិជ្ជកម្ម និងការដាក់ទណ្ឌកម្មរដ្ឋមន្ត្រីជ្រុលនិយម និងអ្នកតាំងលំនៅដោយហិង្សា។
ការអត្ថាធិប្បាយរបស់លោកស្រី បានកើតឡើងនៅពេលដែលគណៈកម្មការរបស់អង្គការសហប្រជាជាតិ បានសន្និដ្ឋានថាអ៊ីស្រាអែល កំពុងប្រព្រឹត្តអំពើប្រល័យពូជសាសន៍ប្រឆាំងនឹងប៉ាឡេស្ទីន នៅតំបន់ហ្គាហ្សា ហើយបានជំរុញឱ្យបញ្ចប់អំពើហិង្សាជាបន្ទាន់។
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានឧ្យដឹងនៅថ្ងៃអង្គារនេះថា អ៊ីស្រាអែលបានចាប់ផ្តើម “ប្រតិបត្តិការដ៏ខ្លាំងក្លា” នៅទីក្រុងហ្គាហ្សា។
អាជ្ញាធរសុខាភិបាលក្នុងតំបន់ហ្គាហ្សាបានរាយការណ៍ថា មនុស្សយ៉ាងតិច ៣៧ នាក់បានស្លាប់ និងរាប់សិបនាក់បាត់ខ្លួននៅក្នុងទីក្រុង ដោយមានអ្នកស្លាប់ចំនួន ៤ នាក់ទៀតនៅកន្លែងផ្សេងទៀត៕
ប្រែសម្រួល ឈូក បូរ៉ា
Recommended for you
