ហ្វាំងឡង់ និងស្នងការការពារជាតិសហភាពអឺរ៉ុប ព្រមព្រៀងគ្នាលេីផែនការជញ្ជាំងការពារយន្តហោះដ្រូន
ហែលស៊ីនគី៖ នាយករដ្ឋមន្ត្រីហ្វាំងឡង់លោក Petteri Orpo និងស្នងការអឺរ៉ុបសម្រាប់ការពារជាតិ និងអវកាសលោក Andrius Kubilius បានព្រមព្រៀងគ្នាថា ការសាងសង់ “ជញ្ជាំងការពារយន្តហោះគ្មានមនុស្សបើក” ឬហៅថា ដ្រូន នៅតាមបណ្តោយព្រំដែនភាគខាងកើតរបស់សហភាពអឺរ៉ុប គួរតែចាប់ផ្តើមក្នុងពេលឆាប់ៗនេះ។
“ជញ្ជាំងការពារយន្តហោះគ្មានមនុស្សបើក” សំដៅលើឧបករណ៍បច្ចេកទេស ដែលត្រូវបានរចនាឡើង ដើម្បីស្វែងរក និងកំទេចយន្តហោះគ្មានមនុស្សបើក។
លោក Kubilius បានទៅទស្សនាទីក្រុង Helsinki ដើម្បីពិភាក្សាជាមួយ លោក Orpo និងរដ្ឋមន្ត្រីការពារជាតិលោក Antti Hakkanen ដោយផ្តោតលើផែនការជញ្ជាំងការពារយន្តហោះគ្មានមនុស្សបើក និងកិច្ចខិតខំប្រឹងប្រែងទូលំទូលាយ ដើម្បីពង្រឹងការការពាររួមរបស់សហភាពអឺរ៉ុប។
លោក Orpo បានបន្ថែមថា ផែនការកំពុងដំណើរការរួចហើយ ដោយកត់សម្គាល់ថា មេដឹកនាំសហភាពអឺរ៉ុប នឹងបន្តការពិភាក្សាលើបញ្ហានេះនៅក្នុងកិច្ចប្រជុំក្រុមប្រឹក្សាអឺរ៉ុបក្រៅផ្លូវការរបស់ពួកគេនៅសប្តាហ៍ក្រោយ នេះបើយោងតាមសេចក្តីប្រកាសព័ត៌មានដែលចេញដោយរដ្ឋាភិបាលហ្វាំងឡង់។
ប្រធានគណៈកម្មការអឺរ៉ុបលោកស្រី Ursula von der Leyen បានអំពាវនាវកាលពីដើមខែនេះ សម្រាប់ការសាងសង់ជញ្ជាំងការពារយន្តហោះគ្មានមនុស្សបើក ដែលជាផ្នែកមួយនៃគំនិតផ្តួចផ្តើម “Eastern Flank Watch” ក្នុងគោលបំណងពង្រឹងការការពារតាមបណ្តោយព្រំដែនខាងក្រៅរបស់សហភាពអឺរ៉ុប៕
ប្រែសម្រួល ឈូក បូរ៉ា
