អ៊ីរ៉ង់ ថ្កោលទោសការគាំទ្ររបស់ G7 ចំពោះការដាក់ទណ្ឌកម្ម អង្គការសហប្រជាជាតិឡើងវិញ លើក្រុងតេអេរ៉ង់
តេអេរ៉ង់៖ អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានថ្កោលទោសក្រុមប្រទេសទាំង៧ (G7) សម្រាប់ការគាំទ្រការស្តារឡើងវិញ នូវទណ្ឌកម្មរបស់អង្គការសហប្រជាជាតិ លើទីក្រុងតេអេរ៉ង់។
កាលពីថ្ងៃពុធ សេចក្តីថ្លែងការណ៍ដែលចេញដោយរដ្ឋមន្ត្រីការបរទេស G7 បានសម្តែងការគាំទ្រចំពោះការធ្វើឱ្យសកម្មនៃយន្តការ “snapback” ដោយបារាំង អង់គ្លេស និងអាល្លឺម៉ង់ ដែលហៅថា E3 ដើម្បីដាក់ទណ្ឌកម្មឡើងវិញរបស់ អង្គការសហប្រជាជាតិលើអ៊ីរ៉ង់។
G7 បានចោទប្រកាន់រដ្ឋាភិបាលអ៊ីរ៉ង់ថា បានបរាជ័យជាបន្តបន្ទាប់ ក្នុងការបំពេញកាតព្វកិច្ចរបស់ខ្លួន ក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ជាមួយមហាអំណាចពិភពលោក ដែលត្រូវបានគេស្គាល់ជាផ្លូវការថា ជាផែនការសកម្មភាពទូលំទូលាយរួម (JCPOA) ។
លោក Baghaei បានរិះគន់សេចក្តីថ្លែងការណ៍របស់ G7 ថាជា “ការលាក់ពុត និងបំភ្លៃការពិត” ដោយថា ការយល់ព្រមរបស់ G7 លើ E3 និងការផ្លាស់ប្តូររបស់សហរដ្ឋអាមេរិក ដើម្បីដាក់ទណ្ឌកម្មឡើងវិញ លើប្រទេសអ៊ីរ៉ង់បានបង្កើតការគាំទ្រ សម្រាប់សកម្មភាពដែល “បំពានច្បាប់អន្តរជាតិ” ។
លោកបានច្រានចោលការអះអាងដែលថា E3 និងវ៉ាស៊ីនតោន បានផ្តល់ផ្លូវការទូតដោយសុច្ចរិត ដោយបន្ទោសការដកសហរដ្ឋអាមេរិក ចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ក្នុងឆ្នាំ២០១៨ និង “ការរំលោភច្បាប់អន្តរជាតិឥតឈប់ឈរ” សម្រាប់វិបត្តិបច្ចុប្បន្ន ៕
ប្រែសម្រួល ឈូក បូរ៉ា
