តម្លៃ Bitcoin បានឡើងលើស ១២៥.០០០ ដុល្លារ ដែលជាកម្រិតខ្ពស់បំផុតមិនធ្លាប់មាន
បរទេស៖ កាលពីថ្ងៃទី៥ ខែតុលា តម្លៃ Bitcoin បានឡើងលើស ១២៥.០០០ ដុល្លារ ដែលជាកម្រិតខ្ពស់បំផុតមិនធ្លាប់មាន។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៥ ខែតុលា ឆ្នាំ២០២៥ បានឱ្យដឹងថា Bitcoin ត្រូវបានជួញដូរក្រោម ១១០.០០០ ដុល្លារ ក្នុងរយៈពេលពីរខែកន្លងមកនេះ។ ទោះយ៉ាងណាក៏ដោយ រូបិយប័ណ្ណគ្រីបតូដ៏ធំបំផុតរបស់ពិភពលោក Bitcoin នេះ បានឃើញការកើនឡើងនៅក្នុងសប្តាហ៍នេះ។
ចាប់ពីថ្ងៃទី ២៩ ខែកញ្ញា ដល់ថ្ងៃទី ៣ ខែតុលា តម្លៃរបស់ Bitcoin បានកើនឡើងជាង ១០.០០០ដុល្លារ ។ កាលពីថ្ងៃទី៤ Bitcoin មានការកើនឡើងដ៏ធំមួយនៅពេលដែលវាបានបញ្ចប់វគ្គជួញដូរនៅជុំវិញ ១២១.០០០$ ទៅ ១២២.០០០ដុល្លារ ។
រូបិយប័ណ្ណឌីជីថលនេះបានបន្តកើនឡើងជិត 2.75% ដល់ ១២៥.២៤៥ដុល្លារ នៅម៉ោង 12:12នាទីរសៀល, នេះបើយោងតាម Reuters ។ នេះគឺជាតម្លៃខ្ពស់បំផុតដែល Bitcoin មិនធ្លាប់មាន។
ពីមុនតម្លៃខ្ពស់បំផុតនៃរូបិយប័ណ្ណឌីជីថលនេះត្រូវបានកត់ត្រានៅ ១២៤.៤៨០ ដុល្លារនៅពាក់កណ្តាលខែសីហា។ ការកើនឡើងនេះត្រូវបានជំរុញដោយបទប្បញ្ញត្តិបើកចំហកាន់តែច្រើនពីរដ្ឋបាលរបស់ប្រធានាធិបតី Donald Trump ក៏ដូចជាតម្រូវការខ្លាំងពីវិនិយោគិនស្ថាប័ន។
នៅម៉ោងរសៀលថ្ងៃទី៥តុលា តម្លៃរបស់ Bitcoin បានធ្លាក់ចុះបន្តិចមកត្រឹម ១២៤.៧០០ ដុល្លារ។ មូលធនប័ត្រទីផ្សារសរុបនៃរូបិយប័ណ្ណនេះឈានដល់ប្រហែល ២.៤៨៥ ពាន់លានដុល្លារ. នេះបើយោងតាម Coinmarketcap ។ តួលេខនេះបានកើនលើសមូលធននីយកម្មនៃសហគ្រាសធំៗដូចជា Amazon ឬ Meta ជាក្រុមហ៊ុនមេរបស់ Facebook ទៅទៀត៕
ប្រែសម្រួលៈ ណៃ តុលា
