លោក Elon Musk ក្លាយជាបុគ្គលទីមួយរបស់ពិភពលោកដែលមានទ្រព្យសម្បត្តិទៅដល់ ៥០០ពាន់លានដុល្លារ
បរទេស៖ យោងតាមការចេញផ្សាយរបស់ RT នាយកប្រតិបត្តិក្រុមហ៊ុន Tesla និង SpaceX លោក Elon Musk បានក្លាយជាមនុស្សដំបូងគេរបស់ពិភពលោកដែលមានទ្រព្យសម្បត្តិសរុប៥០០ ពាន់លានដុល្លារ នេះបើយោងតាមទស្សនាវដ្តី Forbes ។
ទ្រព្យសម្បត្តិរបស់ Musk ត្រូវបានហក់ឡើងខ្លាំងចុងក្រោយនេះដោយការកើនឡើងនៃភាគហ៊ុន Tesla នាពេលថ្មីៗនេះ និងការកើនឡើងនៃការវាយតម្លៃរបស់ក្រុមហ៊ុនឯកជនជាច្រើនផ្សេងទៀតរបស់គាត់។
ភាគហ៊ុនរបស់ក្រុមហ៊ុន Tesla បានកើនឡើងជិត៤ភាគរយកាលពីថ្ងៃពុធ ដោយបានបន្ថែម ៩,៣ពាន់លានដុល្លារដល់ទ្រព្យសម្បត្តិរបស់ Musk និងជំរុញវាឲ្យកើនទៅដល់៥០០,១ពាន់លានដុល្លារ នេះបើយោងតាមបញ្ជីមហាសេដ្ឋី Forbes ។ ភាគហ៊ុន ១២ភាគរយ របស់លោក Musk នៅក្នុងក្រុមហ៊ុនផលិតរថយន្តមានតម្លៃ១៩១ពាន់លានដុល្លារ។
អ្នកវិភាគផ្តល់កិត្តិយសដល់ការកើនឡើងនៃទ្រព្យសម្បត្តិរបស់ Musk នាពេលថ្មីៗនេះចំពោះការផ្តោតអារម្មណ៍ជាថ្មីរបស់គាត់លើអាជីវកម្ម។ ភាគហ៊ុនរបស់ក្រុមហ៊ុន Tesla បានកើនឡើងជិតទ្វេដងចាប់តាំងពីខែមេសា នៅពេលដែលគាត់បានប្រកាសជាលើកដំបូងក្នុងអំឡុងពេលហៅរកប្រាក់ចំណូលថាគាត់នឹងចុះចេញពីតំណែងជាប្រធាននាយកដ្ឋានប្រសិទ្ធភាពរដ្ឋាភិបាល (DOGE) របស់ប្រធានាធិបតីអាមេរិក Donald Trump ដើម្បីលះបង់ពេលវេលាបន្ថែមទៀតដល់ក្រុមហ៊ុនផលិតរថយន្ត និងផលប្រយោជន៍អាជីវកម្មផ្សេងទៀតរបស់គាត់។
គួរឲ្យដឹងដែរថាលោក Musk បានចាកចេញពីទីភ្នាក់ងារនេះ បន្ទាប់ពីមានការប្រេះឆាជាមួយប្រធានាធិបតី ជុំវិញវិក័យប័ត្រពន្ធ និងចំណាយដ៏សំខាន់របស់រដ្ឋាភិបាលអាមេរិក៕
ប្រែសម្រួល៖ស៊ុនលី
