លោក ដូណាល់ ត្រាំ ៖ ទំនាក់ទំនងអាមេរិក-ចិន នឹងល្អ ទោះបីជាមានភាពតានតឹង ពាណិជ្ជកម្មជាថ្មី
វ៉ាស៊ីនតោន ៖ លោកប្រធានាធិបតី ដូណាល់ ត្រាំ បានឧ្យដឹងថាលោកគិតថាទំនាក់ទំនងរបស់សហរដ្ឋអាមេរិកជាមួយប្រទេសចិននឹង “ល្អ” ទោះបីជាមានភាពតានតឹង ពាណិជ្ជកម្មជាថ្មី បន្ទាប់ពីការគំរាមកំហែង របស់លោកក្នុងការដាក់ពន្ធបន្ថែម ១០០ភាគរយលើការនាំចូលរបស់ចិន ដែលចាប់ផ្តើមនៅខែក្រោយ ។
លោក ត្រាំ បានប្រាប់អ្នកសារព័ត៌មាន នៅលើយន្តហោះ Air Force One ថាលោកមាន “ទំនាក់ទំនងដ៏អស្ចារ្យ” ជាមួយប្រធានាធិបតីចិនលោក ស៊ី ជីនពីង ។ សេចក្តីថ្លែងការណ៍ របស់មេដឹកនាំសហរដ្ឋអាមេរិក បានធ្វើឡើងបន្ទាប់ពីលោកបានធ្វើការគំរាមកំហែង ពន្ធថ្មីកាលពីថ្ងៃសុក្រសប្ដាហ៍មុន ដើម្បីឆ្លើយតបទៅនឹងការគ្រប់គ្រង ការនាំចេញថ្មីរបស់ប្រទេសចិន លើរ៉ែកម្រ ។
លោក ត្រាំ បាននិយាយភ្លាមៗ បន្ទាប់ពីលោកបានចេញដំណើរនៅលើយន្តហោះ សម្រាប់ដំណើរទស្សនកិច្ចខ្យល់កួចទៅកាន់ប្រទេសអ៊ីស្រាអែល និងអេហ្ស៊ីបថា “លោកជាមនុស្សតឹងតែងណាស់ ។ លោកជាមនុស្សឆ្លាតណាស់។ លោកគឺជាអ្នកដឹកនាំដ៏អស្ចារ្យ សម្រាប់ប្រទេសរបស់ពួកគេ” ។
ទីក្រុងប៉េកាំង បានចេញការឆ្លើយតបជាផ្លូវការ កាលពីថ្ងៃអាទិត្យ ចំពោះការគំរាមកំហែងពន្ធ របស់គាត់ដោយថាខ្លួនត្រៀមខ្លួន ជាស្រេច ដើម្បីចាត់វិធានការដែលត្រូវគ្នា “ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន”។
នៅពេលសួរថាតើការដំឡើងពន្ធបន្ថែមនៅតែជាផែនការឬអត់ លោក ត្រាំ បានលេីកឡេីងថា វាគឺ “ឥឡូវនេះ” ប៉ុន្តែ “ចាំមើលថាមានអ្វីកើតឡើង” ។
លោកបានបន្ដថា សម្រាប់មនុស្សជាច្រើន កាលបរិច្ឆេទចាប់ផ្តើមនៃពន្ធគយអាចស្តាប់ទៅ “ជិតដល់ជ្រុងហើយ” ប៉ុន្តែ “សម្រាប់ខ្ញុំ នៅពេលដែលខ្ញុំលឺថ្ងៃទី១ ខែវិច្ឆិកា វាគឺជាភាពអស់កល្បជានិច្ច” ដែលជាសញ្ញាថាមានកន្លែង សម្រាប់ប្រទេសទាំងពីរក្នុងការថយក្រោយ៕
ប្រែសម្រួល ឈូក បូរ៉ា
