ប្អូនស្រីពៅរបស់ស្តេចថៃ បង្ហាញបំណងចង់ឱ្យយោធាសាងសង់របង នៅតាមព្រំដែនជាអចិន្ត្រៃយ៍ជាមួយកម្ពុជា
បរទេស៖ ប្អូនស្រីពៅរបស់ព្រះមហាក្សត្រថៃ Maha Vajiralongkorn បានបង្ហាញបំណងចង់ឱ្យយោធាសាងសង់របងនៅតាមព្រំដែនកម្ពុជា-ថៃ បន្ទាប់ពីជម្លោះទឹកដីរវាងប្រទេសទាំងពីរបានផ្ទុះឡើងរហូតដល់ការប៉ះទង្គិចគ្នាយ៉ាងធ្ងន់ធ្ងរកាលពីដើមឆ្នាំនេះ។
យោងតាមសារព័ត៌មាន South China Morning Post ចេញផ្សាយកាលពីថ្ងៃទី១៦ ខែតុលា ឆ្នាំ២០២៥ បានឱ្យដឹងថា ព្រះនាងម្ចាស់ Chulabhorn បានប្រាប់មន្ត្រីកងទ័ពក្នុងអំឡុងពេលកិច្ចប្រជុំនៅទីក្រុងបាងកកសប្តាហ៍នេះថា “សូមជួយពិចារណាពីរបៀបដែលយើងអាចសាងសង់ជញ្ជាំងព្រំដែនអចិន្ត្រៃយ៍រវាងកម្ពុជា និងថៃ មិនមែនជាសំណង់បណ្តោះអាសន្នទេ ប៉ុន្តែជារចនាសម្ព័ន្ធយូរអង្វែង”។ ព្រះនាងក៏បានស្នើឱ្យយោធាសាងសង់លេណដ្ឋានសម្រាប់អ្នកស្រុក រួមជាមួយនឹងកន្លែងសម្រាប់បុគ្គលិកយោធាផងដែរ។
វាជាការកត់សម្គាល់ដ៏កម្រមួយរបស់រាជវង្សថៃ ដែលសមាជិកជាធម្មតាបដិសេធមិនធ្វើសេចក្តីថ្លែងការណ៍នយោបាយ និងគូសបញ្ជាក់អំពីទំនាក់ទំនងដ៏ជូរចត់ជាមួយប្រទេសជិតខាងគឺកម្ពុជា។ ក្នុងការស្ទង់មតិមួយ មានអ្នកឆ្លើយសំណួរជាងពាក់កណ្តាលបាននិយាយថា ប្រទេសថៃមិនគួរមានទំនាក់ទំនងជាមួយប្រទេសកម្ពុជានោះទេ ខណៈ ១៤ ភាគរយទៀតថា កម្ពុជាជាសត្រូវរបស់ប្រទេសថៃ។
ប្រទេសថៃ និងកម្ពុជា មានព្រំដែនប្រមាណ ៨០៤ គីឡូម៉ែត្រ ដែលមានចំណុចជាមួយតំបន់ជម្លោះដែលកំពុងពុះកញ្ជ្រោលអស់ជាច្រើនទសវត្សរ៍មកហើយ។ ភាពតានតឹងបានផ្ទុះឡើងជាការប្រឈមមុខដាក់គ្នាដោយអាវុធដ៏អាក្រក់បំផុតរវាងប្រទេសទាំងពីរកាលពីក្នុងខែកក្កដា ដោយបានសម្លាប់មនុស្សជាច្រើននាក់។
បទឈប់បាញ់ដ៏ផុយស្រួយត្រូវបានសម្រេចបន្ទាប់ពីប្រធានាធិបតីសហរដ្ឋអាមេរិក Donald Trump បានគំរាមបិទកិច្ចព្រមព្រៀងពាណិជ្ជកម្មជាមួយប្រទេសកម្ពុជា និងថៃ លុះត្រាតែប្រទេសទាំងពីរឈប់ប្រយុទ្ធគ្នា៕
ប្រែសម្រួលៈ ណៃ តុលា
