នាយកប្រតិបត្តិ របស់ក្រុមសាជីវកម្មហិរញ្ញវត្ថុ នៅអាមេរិក JPMorgan ព្យាករណ៍ថា មាសអាចឡើងដល់ ១០.០០០ ដុល្លារក្នុងមួយអោន
បរទេស៖ លោក Jamie Dimon នាយកប្រតិបត្តិ របស់ក្រុមសាជីវកម្មហិរញ្ញវត្ថុនៅអាមេរិក JPMorgan បានព្យាករណ៍ថា មាសអាចឡើងដល់ ១០.០០០ ដុល្លារក្នុងមួយអោន ខណៈដែលមាស គឺទទួលបានប្រជាប្រិយភាពឡើងវិញ ជាជម្រកសុវត្ថិភាពចំពេលមានអតិផរណា និងភាពតានតឹងជាសកល។
យោងតាមសារព័ត៌មាន RT ចេញផ្សាយ កាលពីថ្ងៃទី១៦ ខែតុលា ឆ្នាំ២០២៥ បានឱ្យដឹងថា មាសដែលលោហៈដ៏មានតម្លៃ ដែលត្រូវបានចាត់ទុកជាយូរយារណាស់មកហើយជាការការពារប្រឆាំងនឹងអតិផរណា និងការធ្លាក់ចុះនៃរូបិយប័ណ្ណ ដោយសារឯករាជ្យភាពរបស់ខ្លួនពីរដ្ឋាភិបាល និងធនាគារកណ្តាលបានបំបែកកំណត់ត្រាជាប្រវត្តិសាស្ត្រចំនួន ៤.០០០ ដុល្លារកាលពីដើមខែនេះ ហើយបានបន្តកើនឡើង។ វាបានកើនឡើង 58% ដល់កំណត់ត្រាតម្លៃ ៤.២១៨,២៩ដុល្លារ កាលពីថ្ងៃពុធ – ច្រើនជាងទ្វេដងនៃតម្លៃ នៅឆ្នាំ២០២៣ នៅពេលដែលមាសបានជួញដូរក្រោម ២.០០០ដុល្លារ ក្នុងមួយអោន។
លោក Dimon បាននិយាយនៅក្នុងសន្និសីទស្ត្រីដែលមានឥទ្ធិពលបំផុតរបស់ Fortune ក្នុងទីក្រុង Washington កាលពីថ្ងៃអង្គារថា “ខ្ញុំមិនមែនជាអ្នកទិញមាសទេ វាត្រូវចំណាយ 4% ដើម្បីជាម្ចាស់មាស់ ប៉ុន្តែវាអាចទៅដល់ ៥.០០០ ដុល្លារ ឬ ១០.០០០ ដុល្លារយ៉ាងងាយស្រួលនៅក្នុងបរិយាកាសបែបនេះ។”
លោកបានកត់សម្គាល់ថា សេដ្ឋកិច្ចពិភពលោកប្រឈមមុខ នឹងបញ្ហាជាច្រើន រួមទាំងពន្ធគយរបស់សហរដ្ឋអាមេរិក ការពង្រីកឱនភាព អតិផរណា ការផ្លាស់ប្តូរឆ្ពោះទៅរក AI និងភាពតានតឹងផ្នែកភូមិសាស្ត្រនយោបាយ ដូចជាការធ្វើយោធាឡើងវិញ ដែលជំរុញឱ្យវិនិយោគិនងាកទៅរកមាស ដើម្បីកាត់បន្ថយហានិភ័យ។
អ្នកជំនាញទីផ្សារផ្សេងទៀតបានបញ្ចេញមតិស្រដៀងគ្នានេះ។ មហាសេដ្ឋី Ray Dalio បាននិយាយកាលពីថ្ងៃអង្គារថា គាត់មើលឃើញថា មាសជា “អ្នកបង្វែរផលប័ត្រ (ទ្រព្យសកម្មហិរញ្ញវត្ថុ) ដ៏ល្អ” នៅពេលនៃការកើនឡើង នៃបន្ទុកបំណុល របស់រដ្ឋាភិបាល ភាពតានតឹងភូមិសាស្ត្រនយោបាយ និងការបាត់បង់ទំនុកចិត្ត លើស្ថិរភាពនៃរូបិយប័ណ្ណជាតិ៕
ប្រែសម្រួលៈ ណៃ តុលា
