លោក Trump ប្តេជ្ញាថា នឹងតម្លើងពន្ធលើប្រទេសឥណ្ឌា ថែមទៀត រហូតដល់ឥណ្ឌាបញ្ឈប់ នាំចូលប្រេងរបស់រុស្ស៊ី
បរទេស៖ ប្រធានាធិបតីអាមេរិក លោក Donald Trump កាលពីថ្ងៃអាទិត្យ បាននិយាយថា លោកបាននិយាយជាមួយនាយករដ្ឋមន្ត្រីឥណ្ឌាលោក Narendra Modi ហើយបានអះអាងថា ឥណ្ឌានឹងឈប់ទិញប្រេងពីរុស្ស៊ី។ លោកក៏បានព្រមានផងដែរថា ប្រសិនបើក្រុងញូវដែលីមិនអនុវត្តតាមនោះទេ ពន្ធលើទំនិញរបស់ឥណ្ឌានឹងនៅតែមាន «ទ្រង់ទ្រាយធំ»។
យោងតាមសារព័ត៌មាន Indian Express ចេញផ្សាយនៅថ្ងៃទី២០ ខែតុលា ឆ្នាំ២០២៥ បានឱ្យដឹងថា លោក Trump បានប្រាប់អ្នកយកព័ត៌មាន នៅលើយន្តហោះ Air Force One ថា “ខ្ញុំបាននិយាយជាមួយនាយករដ្ឋមន្រ្តី Modi នៃប្រទេសឥណ្ឌា ហើយគាត់បាននិយាយថា គាត់នឹងមិនធ្វើអ្វីជាមួយនឹងប្រេង របស់រុស្ស៊ីទេ” នេះបើយោងតាម Reuters ។ នៅពេលសួរអំពីសេចក្តីថ្លែងការណ៍ របស់ឥណ្ឌាដែលបដិសេធការ សន្ទនាបែបនេះ លោក Trump បានឆ្លើយតបថា “ប៉ុន្តែប្រសិនបើពួកគេចង់និយាយបែបនោះ ពួកគេនឹងបន្តបង់ពន្ធដ៏ច្រើន ហើយពួកគេមិនចង់ធ្វើដូច្នេះទេ” ។
ការទិញប្រេងពីរុស្ស៊ី បានក្លាយជាចំណុចសំខាន់នៃភាពតានតឹងក្នុងការចរចាពាណិជ្ជកម្មរវាងក្រុងវ៉ាស៊ីនតោន និងក្រុងញូវដេលី។ យោងតាមមន្ត្រីអាមេរិក បានឱ្យដឹងថា ប្រហែល ពាក់កណ្តាលនៃពន្ធ 50 ភាគរយលើទំនិញឥណ្ឌា ត្រូវបានគេរាយការណ៍ថា ជាការឆ្លើយតបទៅនឹង ការបន្តនាំចូលប្រេងឆៅពីរុស្ស៊ីរបស់ឥណ្ឌា ៕
ប្រែសម្រួលៈ ណៃ តុលា
