លោក Trump គូសបញ្ជាក់អំពីវត្ថុបំណង របស់អាមេរិក ដែលចង់បានពីភាគីចិន ក្នុងការដោះស្រាយ ជម្លោះពាណិជ្ជកម្ម
បរទេស ៖ យោងតាមការចេញរបស់ RT ប្រធានាធិបតីអាមេរិក លោក Donald Trump បានគូសបញ្ជាក់ពីបញ្ជី នៃការទាមទារសំខាន់ៗ មុនពេលកិច្ចចរចាពាណិជ្ជកម្ម ជាថ្មីជាមួយប្រទេសចិន ខណៈដែលលោកត្រៀម ជួបជាមួយសមភាគីចិន លោក Xi Jinping នៅចុងខែនេះ ហើយគ្រោងនឹងធ្វើទស្សនកិច្ចឆ្នាំ ២០២៦ផង ទៅកាន់ទីក្រុងប៉េកាំង។
ថ្លែងនៅឯសេតវិមាន ជាមួយនាយករដ្ឋមន្ត្រីអូស្ត្រាលី លោក Anthony Albanese កាលពីថ្ងៃចន្ទ លោក Trump បាននិយាយថា លោកបានទទួលការអញ្ជើញពីទីក្រុងប៉េកាំង ហើយមានបំណងធ្វើដំណើរទៅទីនោះ នៅដើមឆ្នាំក្រោយ។
លោកបានបន្ថែមថា លោករំពឹងថា នឹងជួបពិភាក្សាជាមួយលោក Xi នៅកិច្ចប្រជុំកំពូល APEC នៅប្រទេសកូរ៉េខាងត្បូង ដើម្បីសម្រេចបាននូវអ្វីដែលលោកហៅថា កិច្ចព្រមព្រៀងពាណិជ្ជកម្ម ដែលមានភាពយុត្តិធម៌ផងដែរ។
ក្នុងចំណោមបញ្ហាដែលលោក Trump បានលើកឡើង គឺការគ្រប់គ្រងការនាំចេញរ៉ែក ម្ររបស់ប្រទេសចិន និងលំហូរនៃសារធាតុញៀន fentanyl ព្រមទាំងការជាប់គាំង នៃការបញ្ជារទិញសណ្តែកសៀង និងបញ្ហាកោះតៃវ៉ាន់។
គួរឲ្យដឹងដែឬថាភាពតានតឹង រវាងក្រុងវ៉ាស៊ីនតោន និងក្រុងប៉េកាំងបានកើនឡើង បន្ទាប់ពីប្រទេសចិន បានរឹតបន្តឹងការគ្រប់គ្រងការនាំចេញលើភពកម្រនៅដើមខែនេះ ។ ជាការឆ្លើយតប លោក Trump បានគំរាមដាក់ពន្ធបន្ថែម១០០ភាគរយ ទៅលើទំនិញរបស់ចិន ដែលចាប់ផ្តើមនៅក្នុងខែវិច្ឆិកា ៕
ប្រែសម្រួល៖ស៊ុនលី
