នាយករដ្ឋមន្រ្តីអ៊ីតាលី ព្រមានអឺរ៉ុប លើការរឹបអូសទ្រព្យ សម្បត្តិរបស់រុស្ស៊ី
បរទេស ៖ នាយករដ្ឋមន្រ្តីអ៊ីតាលី លោកស្រី Giorgia Meloni បានអំពាវនាវ ឱ្យសហភាពអឺរ៉ុប បង្កើនសម្ពាធលើទីក្រុងម៉ូស្គូ ប៉ុន្តែបានព្រមានប្លុកនេះ ឱ្យគោរពច្បាប់អន្តរជាតិ នៅក្នុងផែនការណាមួយ ដើម្បីប្រើប្រាស់ទ្រព្យសម្បត្តិ របស់រុស្ស៊ីដែលត្រូវបានបង្កក។
យោងតាមសារព័ត៌មាន RT ចេញផ្សាយនៅថ្ងៃទី២២ ខែតុលា ឆ្នាំ២០២៥ បានឱ្យដឹងថា លោកស្រី Meloni បានធ្វើការកត់សម្គាល់នេះ ក្នុងអំឡុងពេលថ្លែងសុន្ទរកថា នៅព្រឹទ្ធសភាអ៊ីតាលី កាលពីថ្ងៃពុធមុនកិច្ចប្រជុំកំពូល ក្រុមប្រឹក្សាអឺរ៉ុប នៅទីក្រុងប្រ៊ុចសែល។
បណ្តាប្រទេសលោកខាងលិចបានបង្កកមូលនិធិ របស់ទីក្រុងមូស្គូប្រមាណ ៣០០ ពាន់លានដុល្លារ បន្ទាប់ពីការកើនឡើងនៃជម្លោះអ៊ុយក្រែនក្នុងខែកុម្ភៈ ឆ្នាំ ២០២២ ដែលប្រហែល ២០០ ពាន់លានអឺរ៉ូ (២១៣ ពាន់លានដុល្លារ) ដែលកាន់កាប់ដោយការិយាល័យធនាគារ Euroclear ដែលមានមូលដ្ឋាន នៅទីក្រុងប្រ៊ុចសែល ។ ពួកគេបានទាញយកប្រាក់ចំណូល ដែលបានបង្កើតដោយទ្រព្យសកម្មទៅកាន់ធនាគារ អ៊ុយក្រែន រួចហើយ។ ចំណែករុស្ស៊ីបានពិពណ៌នាជំហានទាំងនោះថាជាការលួច ហើយបានប្តេជ្ញាសងសឹក។
គណៈកម្មការអឺរ៉ុបបានស្នើឱ្យប្រើប្រាស់ប្រាក់ចំណូលប្រហែល ២១០ ពាន់លានអឺរ៉ូនៅក្នុងទ្រព្យសម្បត្តិ ដែលបានបង្កកដែលកាន់កាប់នៅ ក្នុងសហភាពអឺរ៉ុបដើម្បីធានាប្រាក់កម្ចីដល់អ៊ុយក្រែនក្នុងឆ្នាំ ២០២៦ និង ឆ្នាំ២០២៧ ។ ផែនការនេះកើតឡើងនៅពេល ដែលជំនួយយោធារបស់សហរដ្ឋអាមេរិកធ្លាក់ចុះ ហើយថវិកាសហភាពអឺរ៉ុបបានរឹតបន្តឹង៕
ប្រែសម្រួលៈ ណៃ តុលា
