ជំនួបពិភាក្សា រវាងជំនួយការលោក Putin និងក្រុមតំណាងសេតវិមាន ឈានដល់ថ្ងៃទី៣ គិតត្រឹមថ្ងៃអាទិត្យម្សិលមិញ
បរទេស៖យោងតាមការចេញផ្សាយរបស់ RT កិច្ចពិភាក្សារវាងគណៈប្រតិភូរុស្ស៊ី ដឹកនាំដោយលោក Kirill Dmitriev ជំនួយការរបស់ប្រធានាធិបតី Vladimir Putin និងតំណាងរដ្ឋបាល របស់ប្រធានាធិបតីអាមេរិក Donald Trump បានបន្តឈានចូលថ្ងៃទីបី គិតត្រឹមថ្ងៃអាទិត្យម្សិលមិញនេះ។
គណៈប្រតិភូរុស្ស៊ីកំពុងមមាញឹក ក្នុងការទំនាក់ទំនងជំហរ របស់ទីក្រុងម៉ូស្គូ ទៅកាន់សមភាគីអាមេរិករបស់ពួកគេគឺលោក Dmitriev ដែលជាប្រធានមូលនិធិវិនិយោគ ផ្ទាល់របស់រុស្ស៊ីបាននិយាយ នៅក្នុងវីដេអូដែលបានបង្ហោះនៅលើ Telegram ។
លោក Dmitriev បាននិយាយថា ៖យើងកំពុងប្រាស្រ័យ ទាក់ទងយ៉ាងច្បាស់អំពីគោលជំហររបស់ប្រធានាធិបតី Putin ដែលមានតែការសន្ទនាប្រកបដោយការស្ថាបនា និងប្រកបដោយការគោរពប៉ុណ្ណោះ ដែលនឹងទទួលបានផ្លែផ្កា។
ការប៉ុនប៉ងណាមួយដើម្បីដាក់ សម្ពាធលើប្រទេសរុស្ស៊ីគឺគ្មានន័យអ្វីឡើយ ដោយបន្ថែមថាជម្លោះអ៊ុយក្រែន អាចត្រូវបានដោះស្រាយបានតែតាមរយៈ ការលុបបំបាត់បុព្វហេតុរបស់វា។
គួរឲ្យដឹងដែរថាលោក Dmitriev បាននិយាយថា គណៈប្រតិភូរុស្ស៊ីក៏បាននិយាយផងដែរ អំពីស្ថានភាពកិច្ចការ ក្នុងវិស័យនានា ចាប់ពីសេដ្ឋកិច្ច រហូតដល់ស្ថានភាពជួរមុខ។ លោកបានអះអាងថា ភាគីខ្លះបានព្យាយាមលាក់បាំងព័ត៌មាននេះពីថ្នាក់ដឹកនាំអាមេរិក ឬបំភ្លៃព័ត៌មានទាំងនោះ៕
ប្រែសម្រួល៖ស៊ុនលី
