លោក Trump លើកឡើងថាគាត់ចង់ជួបជាមួយនឹងលោក Kim Jong un សាជាថ្មីម្តងទៀត
បរទេស៖យោងតាមការចេញផ្សាយរបស់ RT ប្រធានាធិបតីអាមេរិក លោក Donald Trump បាននិយាយថា លោកចង់ជួបជាមួយមេដឹកនាំកូរ៉េខាងជើង លោក Kim Jong un ក្នុងអំឡុងដំណើរបំពេញទស្សនកិច្ចនៅអាស៊ីរបស់លោក ដោយបន្ថែមថា លោកមានទំនាក់ទំនងល្អជាមួយមេដឹកនាំកូរ៉េខាងជើងរូបនេះ។
ក្នុងអំឡុងពេលអាណត្តិដំបូងរបស់គាត់ លោក Trump បានក្លាយជាប្រធានាធិបតីអាមេរិកដំបូងគេដែលបានទៅអង្គុយនៅលើទឹកដីរបស់កូរ៉េខាងជើង ដោយគាត់បានជួបជាមួយលោក Kim នៅក្នុងតំបន់គ្មានយោធារបស់កូរ៉េទាំងពីរ។
មេដឹកនាំទាំងពីរបានជួបគ្នាចំនួនបីដងពីឆ្នាំ២០១៨ដល់ឆ្នាំ ២០១៩ ដើម្បីពិភាក្សាអំពីការរំសាយអាវុធនុយក្លេអ៊ែរជាថ្នូរនឹងការលើកទឹកចិត្តផ្នែកសេដ្ឋកិច្ច និងសន្តិសុខ ប៉ុន្តែមិនមានកិច្ចព្រមព្រៀងណាមួយត្រូវបានសម្រេចនៅឡើយទេ។
ថ្លែងទៅកាន់អ្នកសារព័ត៌មាននៅលើយន្តហោះ Air Force One កាលពីថ្ងៃចន្ទ លោក Trump បាននិយាយថា លោកនឹងបើកចំហរក្នុងការជួបជាមួយលោក Kim ក្នុងអំឡុងពេលឈប់សម្រាកនៅប្រទេសកូរ៉េខាងត្បូងនៅចុងសប្តាហ៍នេះ។
គួរឲ្យដឹងដែរថាលោក Trump ក៏គ្រោងនឹងចូលរួមកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងឆ្នេរសមុទ្រ Gyeongju ផងដែរ៕
ប្រែសម្រួល៖ស៊ុនលី
