មេដឹកនាំកំពូលមហាអំណាចអាមេរិក-ចិន នឹងជួបគ្នានៅក្នុងប្រទេសកូរ៉េខាងត្បូង
ប៉េកាំង៖ ដូចដែលបានព្រមព្រៀងគ្នារវាងប្រទេសចិន និងសហរដ្ឋអាមេរិក ប្រធានាធិបតីចនលោក ស៊ី ជីនពីង នឹងជួបជាមួយប្រធានាធិបតីអាមេរិកលោក ដូណាល់ ត្រាំ នៅទីក្រុងប៊ូសាន សាធារណរដ្ឋកូរ៉េនៅថ្ងៃទី៣០ ខែតុលា ម៉ោងក្នុងស្រុក ដើម្បីផ្លាស់ប្តូរទស្សនៈលើទំនាក់ទំនងទ្វេភាគី និងបញ្ហាដែលមានផលប្រយោជន៍ទៅវិញទៅមក នេះបើយោងតាមអ្នកនាំពាក្យក្រសួងការបរទេសចិន។
ក្រៅពីជំនួបនេះ ប្រធានាធិបតីអាមេរិក លោក ដូណាល់ ត្រាំ បានឧ្យដឹងថា លោកទំនងជានឹងកាត់បន្ថយពន្ធរបស់រដ្ឋបាលលោកចំនួន ២០ភាគរយដែលដាក់លើទំនិញចិនលើសារធាតុ fentanyl ហើយរំពឹងថា នឹងមាន “លទ្ធផលល្អណាស់” នៅក្នុងកិច្ចប្រជុំរបស់លោកជាមួយប្រធានាធិបតីចិន លោក ស៊ី ជីនពីងនៅចុងសប្តាហ៍នេះ។
ថ្លែងទៅកាន់អ្នកយកព័ត៌មាននៅលើយន្តហោះ Air Force One ក្នុងដំណើរពីទីក្រុងតូក្យូទៅកាន់ទីក្រុង Busan ប្រទេសកូរ៉េខាងត្បូង លោក ដូណាល់ ត្រាំ បានេីកឡេីងថា លោកឥឡូវនេះចង់ផ្តោតលើប្រទេសចិន ប៉ុន្តែសង្ឃឹមថានឹងជួបជាមួយមេដឹកនាំកូរ៉េខាងជើង លោក គីម ជុងអ៊ុន “នៅចំណុចណាមួយក្នុងពេលអនាគតដ៏ខ្លីខាងមុខ”។
ដោយហៅដំណើរទស្សនកិច្ចរបស់លោកទៅកាន់ប្រទេសម៉ាឡេស៊ី និងជប៉ុនថា “ពិតជាអស្ចារ្យណាស់” លោកបានពណ៌នាអំពីនាយករដ្ឋមន្ត្រីថ្មីរបស់ប្រទេសជប៉ុនលោកស្រី Sanae Takaichi ថាជា “ស្ត្រីដ៏អស្ចារ្យ” ដែល “មុតស្រួច ឆ្លាតណាស់ និងស្វាហាប់ណាស់”៕
ប្រែសម្រួល ឈូក បូរ៉ា
