ឥណ្ឌា ដែលជាប្រទេសប្រើប្រាស់ប្រេងធំ ជាងគេទីបីរបស់ពិភពលោក កំពុងសិក្សាពីឥទ្ធិពល នៃទណ្ឌកម្មរបស់អាមេរិក លើក្រុមហ៊ុនប្រេងយក្សរុស្ស៊ី
បរទេស៖ អ្នកនាំពាក្យ ក្រសួងការបរទេសឥណ្ឌា លោក Randhir Jaiswal បាននិយាយក្នុងអំឡុងសន្និសីទ សារព័ត៌មានប្រចាំសប្តាហ៍ កាលពីថ្ងៃព្រហស្បតិ៍ថា ប្រទេសឥណ្ឌាកំពុងវិភាគឥទ្ធិពល នៃទណ្ឌកម្មថ្មីលើក្រុមហ៊ុនប្រេងរុស្ស៊ី Rosneft និង Lukoil ហើយនឹងធ្វើសកម្មភាព ដោយផ្អែកលើស្ថានភាពដែលវិវត្តន៍ ។
យោងតាមសារព័ត៌មាន RT ចេញផ្សាយនៅថ្ងៃទី៣១ ខែតុលា ឆ្នាំ២០២៥ បានឱ្យដឹងថា សហរដ្ឋអាមេរិកបានដាក់ទណ្ឌកម្មលើក្រុមហ៊ុនទាំងពីររួមជាមួយនឹងក្រុមហ៊ុនបុត្រសម្ព័ន្ធមួយចំនួន នៅចុងខែតុលា ។ បន្ទាប់មក សហភាពអឺរ៉ុបក៏បានអនុវត្តជាផ្លូវការនូវកញ្ចប់ទណ្ឌកម្មទី១៩ របស់ខ្លួនប្រឆាំងនឹងទីក្រុងមូស្គូ ដោយផ្តោតលើនាវា ដឹកប្រេងជាង ១០០ គ្រឿង ព្រមទាំងបុគ្គល និងអង្គភាពបន្ថែម។
អ្នកនាំពាក្យក្រសួងការបរទេសឥណ្ឌា បានមានប្រសាសន៍ថា “យើងកំពុងសិក្សាពីផលប៉ះពាល់នៃទណ្ឌកម្មទាំងនោះ។ លោកបានបន្ថែមថា “យើងធ្វើការសម្រេចចិត្ត ដោយពិចារណា លើការផ្លាស់ប្តូរនៃទីផ្សារពិភពលោក” ។
អ្នកនាំពាក្យរូបនេះបានបន្តថា “ប្រទេសឥណ្ឌាត្រូវបានដឹកនាំដោយការចាំបាច់ ដើម្បីធានាបាននូវថាមពលដែលមានតម្លៃ សមរម្យពីប្រភពផ្សេងៗគ្នា ដើម្បីបំពេញតម្រូវការសន្តិសុខ ថាមពលរបស់ប្រជាជន ១,៤ ពាន់លាននាក់របស់យើង” ។
សូមជម្រាបថា ប្រទេសឥណ្ឌា ដែលជាអ្នកប្រើប្រាស់ប្រេងធំ ជាងគេទីបី របស់ពិភពលោក បានបង្កើនការនាំចូលប្រេងពីរុស្ស៊ី យ៉ាងច្រើនចាប់ តាំងពីឆ្នាំ២០២២ ។ គិតត្រឹមខែកញ្ញា ប្រទេសរុស្ស៊ីមានចំនួន 34% នៃការនាំចូលសរុបរបស់ប្រទេសឥណ្ឌា ដោយផ្អែកលើទិន្នន័យពី Kpler ។ បច្ចុប្បន្ននេះ ប្រទេសនេះទទួលបានប្រេងជាមធ្យម ១,៨ លានបារ៉ែលពីរុស្ស៊ី ក្នុងមួយថ្ងៃ នេះបើយោងតាមអ្នកវិភាគ។
