នាយករដ្ឋមន្រ្តីថមីជប៉ុន បញ្ជាក់ថា លោកស្រី មិនមានគម្រោងរំលាយសភា នោះទេ នាពេលបច្ចុប្បន្ននេះ
តូក្យូ៖ លោកស្រី Sanae Takaichi នាយករដ្ឋមន្ត្រីជប៉ុន បានឧ្យដឹងថា លោកស្រីមិនមានគម្រោងរំលាយសភា តំណាងរាស្ត្រនៅពេលនេះទេ ព្រោះលោកស្រីត្រូវផ្តោត លើគោលនយោបាយ ដែលលោកស្រីចាត់ទុកថា ជាអាទិភាពចម្បង រួមទាំងកញ្ចប់សេដ្ឋកិច្ចផងដែរ។
នាយករដ្ឋមន្ត្រីស្ត្រីដំបូង របស់ប្រទេសនេះ ក៏បានប្រាប់សន្និសីទសារព័ត៌មានមួយនៅទីក្រុង Gyeongju ប្រទេសកូរ៉េខាងត្បូងផងដែរ បន្ទាប់ពីសប្តាហ៍ដ៏មមាញឹក នៃដំណើរទស្សនកិច្ចក្រៅប្រទេស ដែលរួមមានកិច្ចប្រជុំកំពូល រយៈពេលពីរថ្ងៃនៃវេទិកាសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក រហូតដល់ថ្ងៃសៅរ៍ថា លោកស្រីបាន “ចាប់ផ្តើមយ៉ាងរឹងមាំ” ក្នុងនាមជាមេដឹកនាំជប៉ុនក្នុងវិស័យការទូត។
ចាប់តាំងពីការចាប់ផ្តើមគណៈរដ្ឋមន្ត្រីរបស់លោកស្រី កាលពីសប្តាហ៍មុន លោកស្រី Takaichi បានជួបជាមួយមេដឹកនាំ នៃសមាគមប្រជាជាតិអាស៊ីអាគ្នេយ៍ នៅប្រទេសម៉ាឡេស៊ី បានទទួលស្វាគមន៍ប្រធានាធិបតីអាមេរិក លោក ដូណាល់ ត្រាំ នៅប្រទេសជប៉ុន មុនពេលចូលរួមកិច្ចប្រជុំកំពូល APEC នៅកូរ៉េខាងត្បូង ។
នៅក្នុងនោះដែរ លោកស្រីបានជួបពិភាក្សាទ្វេភាគី ជាមួយប្រធានាធិបតីកូរ៉េខាងត្បូង លោក Lee Jae Myung និងប្រធានាធិបតីចិន លោក ស៊ី ជីនពីង នៅខាងក្រៅកិច្ចប្រជុំកំពូល APEC។
ដោយកត់សម្គាល់ថា លោកស្រីបានដាក់ “មូលដ្ឋានគ្រឹះដើម្បីជំរុញការទូតនាពេលអនាគត” ក្នុងរយៈពេលមួយសប្តាហ៍កន្លងមកនេះ លោកស្រី Takaichi បានសន្យាថានឹងខិតខំពង្រឹងសម្ព័ន្ធភាពសន្តិសុខជប៉ុន-សហរដ្ឋអាមេរិក ដោយសម្រេចបាននូវ “តំបន់ឥណ្ឌូ-ប៉ាស៊ីហ្វិកសេរី និងបើកចំហ” និងជំរុញទំនាក់ទំនងនៃការជឿទុកចិត្តជាមួយសមភាគីក្នុងតំបន់៕
ប្រែសម្រួល ឈូក បូរ៉ា
