អ៊ីរ៉ង់ បញ្ជាក់ថាកិច្ចព្រមព្រៀង អាចធ្វើទៅបាន តាមរយៈការចរចា ដោយប្រយោលជាមួយអាមេរិក
តេអេរ៉ង់៖ រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានឧ្យដឹងថា ទីក្រុងតេអេរ៉ង់ មិនចាប់អារម្មណ៍ក្នុងការចរចា ដោយផ្ទាល់ជាមួយទីក្រុងវ៉ាស៊ីនតោននោះទេ ប៉ុន្តែកិច្ចព្រមព្រៀង មួយអាចសម្រេចបាន តាមរយៈការចរចាដោយប្រយោល។
នៅក្នុងបទសម្ភាសន៍ជាមួយ Al Jazeera របស់ប្រទេសកាតា ដែលចេញផ្សាយកាលពីថ្ងៃសៅរ៍ លោក Araghchi បានបង្ហាញពីភាពត្រៀមខ្លួនរបស់អ៊ីរ៉ង់ ក្នុងការធ្វើកិច្ចចរចា ដើម្បីដោះស្រាយកង្វល់អំពីកម្មវិធី នុយក្លេអ៊ែររបស់ខ្លួន។
លោកបានកត់សម្គាល់ថា “យើងមិនមានបំណង ចង់ធ្វើកិច្ចចរចាដោយផ្ទាល់ជាមួយទីក្រុងវ៉ាស៊ីនតោននោះទេ ប៉ុន្តែយើងអាចសម្រេចបានកិច្ចព្រមព្រៀង តាមរយៈការចរចាដោយប្រយោល”។
ដោយបញ្ជាក់ជាថ្មីអំពីលក្ខណៈសន្តិភាព នៃកម្មវិធីនុយក្លេអ៊ែររបស់ខ្លួន លោក Araghchi បានឧ្យដឹងថា ការបង្កើនសារធាតុអ៊ុយរ៉ាញ៉ូម របស់អ៊ីរ៉ង់មិនអាចបញ្ឈប់បាននោះទេ ហើយថា “អ្វីដែលមិនអាចសម្រេច បានដោយសង្គ្រាមមិនអាចសម្រេចបានតាមរយៈនយោបាយនោះទេ”។
លោកបានបន្ដថា ស្តុកសារធាតុអ៊ុយរ៉ាញ៉ូម ៦០ភាគរយរបស់ប្រទេសនេះ ៤០០គីឡូក្រាមនៅតែត្រូវបានកប់នៅក្រោមគំនរបាក់បែកនៃរោងចក្របរមាណូ ដែលត្រូវបានទម្លាក់គ្រាប់បែករបស់អ៊ីរ៉ង់ ហើយមិនត្រូវបានផ្ទេរទៅកន្លែងផ្សេងទៀតទេ៕
