វិមានក្រឹមឡាំងថ្លែងការណ៍អំពីការធ្វើតេស្តមីស៊ីលឆ្លងទ្វីប ICBM របស់សហរដ្ឋអាមេរិក
បរទេស៖យោងតាមការចេញផ្សាយរបស់ RT អ្នកនាំពាក្យវិមានក្រឹមឡាំង លោក Dmitry Peskov បាននិយាយថាសហរដ្ឋអាមេរិកបានជូនដំណឹងដល់ប្រទេសរុស្ស៊ីអំពីផែនការរបស់ខ្លួនក្នុងការបាញ់បង្ហោះមីស៊ីលឆ្លងទ្វីប Minuteman III មុនពេលគ្រាប់រ៉ុក្កែតត្រូវបានបាញ់សាកល្បងកាលពីថ្ងៃពុធ។
ថ្លែងទៅកាន់អ្នកសារព័ត៌មានជាច្រើនម៉ោងក្រោយមក មន្ត្រីរូបនេះបាននិយាយថា មីស៊ីលដែលជាប្រភេទមីស៊ីលដែលមិនបានគោរពតាមការកំណត់អត្តសញ្ញាណនៃការបាញ់បង្ហោះ ក្រោមបទប្បញ្ញត្តិអន្តរជាតិ។ យ៉ាងណាក្តីលោកPeskov បានបន្ថែមថា៖យើងក៏ជូនដំណឹងដល់ ប្រទេសផ្សេងទៀត នៅពេលធ្វើការបាញ់បង្ហោះបែបនេះត្រូវបានធ្វើឡើង។
ដោយនិយាយអំពីសមត្ថភាពយោធាផ្ទាល់របស់រុស្ស៊ី លោក Peskov បាននិយាយថា ខណៈពេលដែលទីក្រុងម៉ូស្គូ មិនចូលរួមក្នុងការប្រណាំងសព្វាវុធណាមួយនៅឡើយនោះ ជាក់ស្តែងរុស្សីបានបង្កើតប្រព័ន្ធអាវុធយុទ្ធសាស្ត្ររបស់ខ្លួនអស់រយៈពេលជាច្រើនឆ្នាំ ស្របតាមចក្ខុវិស័យរយៈពេលវែងរបស់ខ្លួនរួចទៅហើយ។
នៅព្រឹកថ្ងៃពុធនេះ កងទ័ពអាកាសអាមេរិកបានប្រកាសថា ខ្លួនបានបាញ់សាកល្បងដោយជោគជ័យនូវមីស៊ីលផ្លោងអន្តរទ្វីប Minuteman III ដែលគ្មានអាវុធពីមូលដ្ឋានទ័ពអាកាស Vandenberg ។
គួរឲ្យដឹងដែរថាគ្រាប់រ៉ុក្កែតនេះអាចផ្ទុកក្បាលគ្រាប់នុយក្លេអ៊ែរតែមួយបានដោយមានសមត្ថភាពទៅដល់ជាង ៣០០ គីឡូតោននៃសារធាតុផ្ទុះTNT ដែលមានកម្លាំងខ្លាំងជាងគ្រាប់បែកទម្លាក់លើទីក្រុងហ៊ីរ៉ូស៊ីម៉ាដល់ទៅ ២០ ដងកាលពីក្នុងឆ្នាំ ១៩៤៥៕
ប្រែសម្រួល៖ ស៊ុនលី
