ប្រធានាធិបតីប្រេស៊ីល ជំរុញការផ្លាស់ប្តូរ ថាមពលយ៉ាងឆាប់រហ័ស ដើម្បីទប់ស្កាត់ការឡើងកំដៅផែនដី
ប្រេស៊ីល៖ ប្រធានាធិបតីប្រេស៊ីល លោក Luiz Inacio Lula da Silva បានជំរុញឱ្យប្រទេសនានាពន្លឿនការផ្លាស់ប្តូរទៅជាថាមពលកកើតឡើងវិញ និងពង្រឹងការការពារបរិស្ថាន ដើម្បីទប់ស្កាត់ការឡើងកំដៅផែនដី។
នៅក្នុងសុន្ទរកថា បើកកិច្ចប្រជុំកំពូលរបស់មេដឹកនាំមុនសន្និសីទ ស្តីពីការប្រែប្រួលអាកាសធាតុលើកទី៣០ របស់អង្គការសហប្រជាជាតិ (COP30) ដែលគ្រោងធ្វើឡើងចាប់ពីថ្ងៃទី១០ ដល់ថ្ងៃទី២១ ខែវិច្ឆិកា នៅទីក្រុង Belem រដ្ឋធានីនៃរដ្ឋ Para ភាគខាងជើងប្រទេស លោក Lula បានឧ្យដឹងថា គោលដៅសំខាន់នៃ COP30 គឺដើម្បីបង្កើតការឯកភាពគ្នាលើការ ឆ្លើយតបជាសកលចំពោះវិបត្តិអាកាសធាតុ។
លោកបានប្រាប់អ្នកតំណាងជាង ៧០នាក់មកពីរដ្ឋាភិបាល និងអង្គការអន្តរជាតិថា “ការបង្កើនល្បឿននៃការផ្លាស់ប្តូរថាមពល និងការការពារធម្មជាតិគឺ ជាមធ្យោបាយពីរដែលមានប្រសិទ្ធភាពបំផុត ដើម្បីទប់ស្កាត់ការឡើងកំដៅផែនដី”។
លោកបានរិះគន់ភាពជ្រុលនិយម និង “ផលប្រយោជន៍អាត្មានិយម” ដែលដាក់ផលប្រយោជន៍បុគ្គលលើសពីផលប្រយោជន៍រួម ដោយកត់សម្គាល់ថានៅតែមានការផ្តាច់ទំនាក់ទំនងរវាងបរិបទភូមិសាស្ត្រនយោបាយ និងគ្រាអាសន្នអាកាសធាតុ។
លោកបានជំរុញឱ្យអ្នកធ្វើការសម្រេចចិត្តលើពិភពលោកបែងចែកធនធានតិចជាងមុនសម្រាប់ជម្លោះ និងច្រើនជាងនេះទៅទៀតសម្រាប់ការការពារបរិស្ថាន ដោយសង្កត់ធ្ងន់ថា “យុត្តិធម៌អាកាសធាតុ គឺជាសម្ព័ន្ធមិត្តនៃការប្រយុទ្ធប្រឆាំងនឹងភាពអត់ឃ្លាន និងភាពក្រីក្រ” និងអំពាវនាវឱ្យ COP30 ក្លាយជាសន្និសីទស្តីពីការឡើងកំដៅផែនដី៕
ប្រែសម្រួល ឈូក បូរ៉ា
