ពន្ធគយរបស់អាមេរិក ជំរុញឱ្យក្រុមហ៊ុនអាល្លឺម៉ង់ កាន់តែច្រើនផ្លាស់ប្តូរ ផលិតកម្មទៅក្រៅប្រទេស
ប៊ែរឡាំង ៖ ការស្ទង់មតិ អាជីវកម្មមួយ បានបង្ហាញថា ការដំឡើងពន្ធគយ របស់សហរដ្ឋអាមេរិក កំពុងធ្វើឱ្យសម្ពាធ កាន់តែខ្លាំងឡើង លើឧស្សាហកម្មអាល្លឺម៉ង់ ដោយក្រុមហ៊ុន ផលិតប្រហែលពីរក្នុងចំណោមបី បានផ្លាស់ប្តូរផលិតកម្មទៅ ក្រៅប្រទេសរួចហើយ ឬមានគម្រោងធ្វើដូច្នេះនៅក្នុងឆ្នាំខាងមុខ។
យោងតាមរបាយការណ៍ដែលចេញ ផ្សាយដោយក្រុមហ៊ុនប្រឹក្សាយោបល់ Deloitte និងសហព័ន្ធឧស្សាហកម្មអាល្លឺម៉ង់ (BDI) មួយភាគប្រាំនៃក្រុមហ៊ុនអាល្លឺម៉ង់ ដែលត្រូវបានស្ទង់មតិបានផ្លាស់ប្តូរកន្លែងផលិតទៅក្រៅប្រទេសរួចហើយ ដែលជាការកើនឡើង ៨ ភាគរយ ក្នុងរយៈពេលពីរឆ្នាំកន្លងមក ។ របាយការណ៍នេះបានឲ្យដឹងថា “គោលនយោបាយពន្ធគយ កំពុងបង្កើនល្បឿនការផ្លាស់ប្តូរទីតាំងឧស្សាហកម្មអាល្លឺម៉ង់”។
ក្នុងចំណោមអ្នកឆ្លើយតបចំនួន ១៤៨ ក្នុងនោះ ៨៤ ភាគរយជាក្រុមហ៊ុនធំៗ ដែលភាគច្រើនមកពីវិស័យ ឧស្សាហកម្មសំខាន់ៗរបស់អាល្លឺម៉ង់ដូចជា គ្រឿងចក្រ រថយន្ត និងសារធាតុគីមី ។ របាយការណ៍នេះបានរកឃើញថា ៤៣ ភាគរយនៃក្រុមហ៊ុនមានគម្រោងផ្លាស់ប្តូរកន្លែងផលិតទៅក្រៅប្រទេស ក្នុងរយៈពេលពីរទៅបីឆ្នាំខាងមុខ កើនឡើងពី ៣៣ ភាគរយកាលពីពីរឆ្នាំមុន។
ក្រៅពីផលិតកម្ម ៣០ ភាគរយបានឲ្យដឹងថា ពួកគេមានបំណងផ្លាស់ប្តូរការអភិវឌ្ឍន៍ ផលិតផលទៅក្រៅ ប្រទេស ក្នុងរយៈពេលពីរទៅបីឆ្នាំខាងមុខ ខណៈដែល ៣៥ ភាគរយរំពឹងថាសកម្មភាព ស្រាវជ្រាវរបស់ពួកគេនឹង ត្រូវបានអនុវត្តនៅខាងក្រៅប្រទេសអាល្លឺម៉ង់ ដែលទាំងពីរនេះ កើនឡើងគួរឱ្យកត់សម្គាល់ពីឆ្នាំ ២០២៣។
សម្រាប់ក្រុមហ៊ុនដែលកំពុងរៀបចំផ្លាស់ប្តូរ ទីតាំងប្រតិបត្តិការ អឺរ៉ុបនៅតែជាគោលដៅសំខាន់មួយ ដែលមានចំនួនប្រហែល ៣០ ភាគរយនៃការផ្លាស់ប្តូរ ដែលបានគ្រោងទុក ខណៈដែលអាស៊ីកំពុងទាក់ទាញចំណាប់អារម្មណ៍កាន់តែខ្លាំងឡើង។ របាយការណ៍នេះបានឲ្យដឹងថា ១៦ ភាគរយនៃអ្នកឆ្លើយតប កំពុងពិចារណាលើប្រទេសចិន និង ១៩ ភាគរយទៀតកំពុងសម្លឹងមើល ទីផ្សារអាស៊ីផ្សេងទៀត។
លោក Juergen Sandau អ្នកជំនាញខ្សែ សង្វាក់ផ្គត់ផ្គង់ Deloitte បានឲ្យដឹងថា “ក្រុមហ៊ុនអាចសម្រេច បាននូវអត្ថប្រយោជន៍ ចំណាយរយៈពេលខ្លី ដោយការផលិតនៅកន្លែងផ្សេង ប៉ុន្តែនេះមិនចាំបាច់ធ្វើឱ្យ ពួកគេមានភាពធន់ ជាងមុននោះទេ” ដោយព្រមានថាការរំខានដល់ការផ្គត់ផ្គង់ ដែលអាចកើតមានអាចធ្វើឱ្យការ សន្សំដែលរំពឹងទុកថយ ចុះយ៉ាងឆាប់រហ័ស៕
