ឥណ្ឌា កំពុងព្យាយាមក្នុងការស្វែងរក ការបញ្ជាទិញមីស៊ីលរុស្សី ច្រើនបន្ថែមទៀត បន្ទាប់ពីប្រឈមមុខនឹងប៉ាគីស្ថាន
បរទេស ៖ យោងតាមការចេញផ្សាយរបស់ RT ដែលបានដកស្រង់ព័ត៌មាន ចេញពីកាសែត Hindustan Times (HT) បានរាយការណ៍កាលពីថ្ងៃសុក្រថា ក្រសួងការពារជាតិ ឥណ្ឌា កំពុងស្វែងរកទិញមីស៊ីល ចំនួន៣០០គ្រាប់ទៀតគឺ ជាប្រព័ន្ធមីស៊ីលបាញ់ ពីដីទៅអាកាស S-400 ផលិតដោយរុស្ស៊ី ដើម្បីបំពេញស្តុកទុកបន្ទាប់ ពីការប្រឈមមុខដាក់គ្នា ជាមួយប៉ាគីស្ថានកាលពីខែឧសភា។
កាសែតនេះបាននិយាយថា ក្រសួងកំពុងរៀបចំ ជាសំណើរ ទៅកាន់ក្រុមហ៊ុន Rosoboronexport របស់រុស្ស៊ីសម្រាប់មីស៊ីល ទាំងនោះក្នុងតំលៃប្រហែល១,២ពាន់លានដុល្លារ ។
ការទិញនេះត្រូវបានគេរំពឹងថា នឹងបញ្ចប់មុនដំណាច់ខែមីនា ឆ្នាំ ២០២៦បន្ទាប់ពីវាទទួលបានការ បញ្ជាក់រួចរាល់ពីគណៈកម្មាធិការ រដ្ឋាភិបាលឥណ្ឌាចំនួន២ ដោយរដ្ឋមន្ត្រីការពារជាតិ Rajnath Singh ដែលបានយល់ព្រមរួចហើយ។
កាលពីខែឧសភា នាយករដ្ឋមន្ត្រីឥណ្ឌា Narendra Modi បានសរសើរពីពីសមត្ថភាពនៃមីស៊ីល S-400 ដែលផលិតដោយរុស្ស៊ី ក្នុងអំឡុងពេលការប្រឈមមុខគ្នាផ្នែកយោធារយៈពេលបួនថ្ងៃរបស់ប្រទេសជាមួយប៉ាគីស្ថាន ដែលមានឈ្មោះប្រតិបត្តិថា Operation Sindoor ។
គួរឲ្យដឹងដែរថារដ្ឋាភិបាលញូវ ដែលីត្រូវបាន គេរាយការណ៍ថា កំពុងពិចារណាផងដែរ អំពីការទិញប្រព័ន្ធការពារដែន អាកាសរយៈចម្ងាយខ្លី និងមធ្យម Pantsir ដែលអាចភ្ជាប់ជាមួយ S-400 ដើម្បីបង្កើតស្រទាប់ការពារប្រឆាំង នឹងគ្រាប់រ៉ុក្កែតមីស៊ីល ដ្រូន និងយន្តហោះបានយ៉ាងមានប្រសិទ្ធភាព៕
ប្រែសម្រួល៖ស៊ុនលី
