លោក Macron និយាយថាផែនការសន្តិភាពរុស្ស៊ី-អ៊ុយក្រែន ត្រូវតែពាក់ព័ន្ធនឹង អ៊ុយក្រែន និងអឺរ៉ុប
ប៉ារីស ៖ ប្រធានាធិបតីបារាំង លោក អេម៉ានុយអែល ម៉ាក្រុង បានឧ្យដឹងថា «ផែនការសន្តិភាព» ណាមួយទាក់ទងនឹងជម្លោះរុស្ស៊ី-អ៊ុយក្រែន អាចត្រូវបានបញ្ចប់ លុះត្រាតែមានការចូលរួមពីអ៊ុយក្រែន និងអឺរ៉ុបក្នុងការចរចា។
លោក ម៉ាក្រុង បានធ្វើការកត់សម្គាល់នេះ នៅក្នុងសន្និសីទ សារព័ត៌មានរួមគ្នា មួយនៅឯវិមាន Elysee បន្ទាប់ពីបានជួបជាមួយប្រធានាធិបតី អ៊ុយក្រែនលោក វូឡូឌីមៀ ហ្សេឡិនស្គី ដែលកំពុងទស្សនកិច្ច ។
លើបញ្ហានានា រួមទាំងការបង្កកទ្រព្យសម្បត្តិរបស់រុស្ស៊ី ការធានាសន្តិសុខ និងការចូលជាសមាជិកសហភាពអឺរ៉ុបរបស់អ៊ុយក្រែន លោក ម៉ាក្រុង បានលេីកឡេីងថា កិច្ចព្រមព្រៀង «អាចត្រូវបានបញ្ចប់ លុះត្រាតែមានបណ្តាប្រទេសនៅអឺរ៉ុប នៅជុំវិញតុចរចា»។
ប្រធានាធិបតីបារាំង ក៏បានសង្កត់ធ្ងន់ផងដែរថា «មិនមានផែនការសន្តិភាពដែលបានបញ្ចប់ដូចសព្វថ្ងៃនេះទេ» នេះបេីយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក ហ្សេឡិនស្គី បានឧ្យដឹងផងដែរថា អ៊ុយក្រែន បានស្វែងរកការបញ្ចប់ជម្លោះ «តាមរបៀបថ្លៃថ្នូរ» ដោយអំពាវនាវឱ្យមានការធានាសន្តិសុខ «រឹងមាំ» ហើយបានកត់សម្គាល់ថា «បញ្ហាទឹកដីនឹងពិបាកបំផុត» នៅក្នុងកិច្ចពិភាក្សានាពេលអនាគត៕
ប្រែសម្រួល ឈូក បូរ៉ា
