រដ្ឋមន្ត្រីការបរទេសអ៊ីរ៉ាក់ សំដែងការភ្ញាក់ផ្អើល បន្ទាប់ពីអាមេរិក បានធ្វើការថ្លែងការណ៍ អំពីកិច្ចការងារផ្ទៃក្នុងរបស់ខ្លួន
បរទេស ៖ ទីភ្នាក់ងារចិនស៊ិនហួ ចេញផ្សាយនៅថ្ងៃនេះ បានឲ្យដឹងថា រដ្ឋមន្ត្រីការបរទេស នៃប្រទេសអ៊ីរ៉ាក់ លោក Fuad Hussein បានប្រាប់បេសកជនពិសេស អាមេរិកទទួលបន្ទុកស៊ីរី លោក Tom Barrack កាលពីថ្ងៃអាទិត្យថា រដ្ឋាភិបាលអ៊ីរ៉ាក់មាន ការភ្ញាក់ផ្អើល ចំពោះសេចក្តីថ្លែងការណ៍ នាពេលថ្មីៗនេះរបស់លោក Barrack ទាក់ទងនឹងស្ថានភាពផ្ទៃក្នុង របស់ប្រទេសអ៊ីរ៉ាក់។
នៅក្នុងបទសម្ភាសន៍ថ្មីៗនេះស្តីពីគោលនយោបាយមជ្ឈិមបូព៌ារបស់សហរដ្ឋអាមេរិក លោក Barrack បាននិយាយថា វិមជ្ឈការពិតជាមិនដំណើរការនៅកន្លែងណាមួយនៅក្នុងតំបន់នេះទេ ដោយលើកយកប្រទេសអ៊ីរ៉ាក់ជាឧទាហរណ៍។
លោកក៏បានអះអាងដែរថា ខណៈនាយករដ្ឋមន្ត្រីអ៊ីរ៉ាក់ជាប់ឆ្នោត លោកមាន អំណាចស្មើសូន្យ ខណៈនាយករដ្ឋមន្ត្រី គឺមិនអាចបង្កើតសភាចម្រុះបានឡើយ។
ក្នុងអំឡុងពេលនៃកិច្ចប្រជុំរបស់ពួកគេដែលធ្វើឡើងនៅខាងក្រៅវេទិកាទីក្រុង Doha លើកទី២៣នៅប្រទេសកាតា លោក Hussein បានសង្កត់ធ្ងន់ថាជម្រើស របស់ប្រជាជនអ៊ីរ៉ាក់ ត្រូវបានគោរព ហើយថា លទ្ធិប្រជាធិបតេយ្យ និងប្រព័ន្ធសហព័ន្ធ ត្រូវបានបញ្ចូល ក្នុងរដ្ឋធម្មនុញ្ញ ហើយបានក្លាយទៅជាមាគ៌ាដ៏រឹងមាំដោយគ្មានជម្រើស ទោះជាមានបញ្ហា ប្រឈមក៏ដោយ។
គួរឲ្យដឹងដែរថាលោក Barrack បាននិយាយថា ៖រដ្ឋបាលសហរដ្ឋអាមេរិក ចាត់ទុកបទពិសោធន៍ របស់អ៊ីរ៉ាក់ដោយការគោរព ហើយការ លើកឡើង របស់គាត់ គឺទាក់ទងនឹងបទពិសោធន៍ របស់អាមេរិកនៅអ៊ីរ៉ាក់ ។ មន្ត្រីទាំងពីរក៏បានពិភាក្សា អំពីទំនាក់ទំនងទ្វេភាគី និងកិច្ចការងារនៅប្រទេសស៊ីរី ផងដែរ៕
ប្រែសម្រួល៖ស៊ុនលី
