សហរដ្ឋអាមេរិក កំពុងធ្វើសង្គ្រាមផ្លូវចិត្ត ប្រឆាំងនឹងប្រទេស វេណេស៊ុយអេឡា
ការ៉ាកាស៖ រដ្ឋមន្ត្រីការបរទេសវេណេស៊ុយអេឡា លោក Yvan Gil បានឧ្យដឹងថា រដ្ឋាភិបាលសហរដ្ឋអាមេរិក កំពុងធ្វើ «សង្គ្រាមផ្លូវចិត្ត» ប្រឆាំងនឹងប្រទេសវេណេស៊ុយអេឡា បន្ទាប់ពីការបរាជ័យ នៃទណ្ឌកម្មសេដ្ឋកិច្ចរបស់ខ្លួន។
លោកបានឧ្យដឹងក្នុងអំឡុងពេលបើកសម័យប្រជុំសភាប្រជាជន ដើម្បីសន្តិភាព និងអធិបតេយ្យភាព នៃអាមេរិករបស់យើង ដែលជាព្រឹត្តិការណ៍មួយ ដែលកំពុងប្រារព្ធឡើងនៅទីក្រុងការ៉ាកាសថា «ឥឡូវនេះពួកគេកំពុងងាក ទៅរកសង្គ្រាមផ្លូវចិត្ត និងសង្គ្រាមផ្លូវចិត្តយោធា»។
ក្នុងនាមជាផ្នែកមួយនៃយុទ្ធសាស្ត្រថ្មីរបស់ខ្លួន លោកបានលេីកឡេីងថា សហរដ្ឋអាមេរិកកំពុងប្រើប្រាស់ «អំណាចសេដ្ឋកិច្ច អំណាចយោធា និងលើសពីនេះទៅទៀត អំណាចប្រព័ន្ធផ្សព្វផ្សាយ ដើម្បីធ្វើសង្គ្រាមផ្លូវចិត្តដែលមិនធ្លាប់មានពីមុនមក» ប្រឆាំងនឹងប្រទេសវេណេស៊ុយអេឡា និងតំបន់។
លោកបានបន្ដថា យើងកំពុងប្រឈមមុខនឹង «បញ្ហាប្រឈមដ៏សំខាន់មួយ នៅក្នុងប្រវត្តិសាស្ត្រ នៃសាធារណរដ្ឋរបស់យើង នៅក្នុងតំបន់របស់យើង» ដោយបន្ថែមថា ប្រតិភូជាង ៥០០នាក់មកពីប្រទេសប្រហែល ៥០នៅទូទាំងទ្វីបទាំងអស់ កំពុងចូលរួមក្នុងការជួបជុំនេះ ។
លោកបានបន្ថែមថា ព្រឹត្តិការណ៍នេះ ដែលរៀបចំឡើង ដោយក្រុមប្រឹក្សាជាតិ សម្រាប់អធិបតេយ្យភាព និងសន្តិភាព នៃប្រទេស វេណេស៊ុយអេឡា នឹងផ្តោតលើបញ្ហាសំខាន់ៗ ដូចជាការគំរាមកំហែងផ្នែកយោធា របស់សហរដ្ឋអាមេរិក ឧក្រិដ្ឋកម្មឆ្លងដែន នៅក្នុងតំបន់ និង គោលលទ្ធិ Monroe ដែលជាគោលនយោបាយមួយ ដែលត្រូវបានរស់ឡើងវិញ ដោយទីក្រុងវ៉ាស៊ីនតោន ដើម្បី «បង្កើតការត្រួតត្រា» នៅក្នុងតំបន់៕
ប្រែសម្រួល ឈូក បូរ៉ា
