អាហ្វ្រិកខាងត្បូង ចូលរួមជាមួយសមាជិក G20 ជុំវិញការដកចេញពីអាមេរិក និងបញ្ជាក់ជាថ្មីថា មិនធ្វើពហិការកិច្ចប្រជុំកំពូល Miami
បរទេស៖ អាហ្វ្រិកខាងត្បូង បានចូលរួមជាមួយស្ថានទូតនៃប្រទេសទាំង២០ ហៅកាត់ថា (G20) បន្ទាប់ពីការដកចេញពីសកម្មភាពទាក់ទងនឹង G20 ដោយសហរដ្ឋអាមេរិក នេះបើយោងតាមរដ្ឋមន្ត្រីទំនាក់ទំនងអន្តរជាតិ និងសហប្រតិបត្តិការអាហ្វ្រិកខាងត្បូង លោក Ronald Lamola។
នៅក្នុងបទសម្ភាសន៍ជាមួយសាជីវកម្មផ្សព្វផ្សាយអាហ្វ្រិកខាងត្បូងកាលពីថ្ងៃសៅរ៍ លោក Lamola បានឲ្យដឹងថា អាហ្វ្រិកខាងត្បូង នឹងមិនចូលរួមកិច្ចប្រជុំកំពូល G20 ឆ្នាំក្រោយនៅទីក្រុង Miami សហរដ្ឋអាមេរិកនោះទេ លុះត្រាតែខ្លួនទទួលបានការអញ្ជើញជាផ្លូវការពីទីក្រុងវ៉ាស៊ីនតោន។ ទោះជាយ៉ាងណាក៏ដោយ លោកបានសង្កត់ធ្ងន់ថា ទីក្រុង Pretoria នឹងមិនអំពាវនាវឱ្យមានការធ្វើពហិការកិច្ចប្រជុំកំពូលនោះទេ ទោះបីជាវាត្រូវបានដកចេញក៏ដោយ។
រដ្ឋមន្ត្រីរូបនេះបានបន្ដថា សហរដ្ឋអាមេរិកបានធ្វើការសម្រេចចិត្តឯកតោភាគីនៅឆ្នាំនេះលើបញ្ហាជាច្រើន រួមទាំងពាណិជ្ជកម្ម និងបានដកខ្លួនចេញពីវេទិកាពហុភាគីជាច្រើន។ លោកបានមានប្រសាសន៍ថា “ប្រសិនបើយើងផ្តល់ឱ្យពួកគេនូវការធ្វើពហិការ យើងនឹងផ្តល់ឱកាសឱ្យពួកគេធ្វើការតែម្នាក់ឯងបន្ថែមទៀត។ ដូច្នេះពួកគេត្រូវតែចូលរួម”។
លោក Lamola បានបន្ថែមថា សមាជិក G20 ភាគច្រើននឹងបន្តការពិភាក្សាជាមួយសហរដ្ឋអាមេរិកលើការចូលរួមរបស់អាហ្វ្រិកខាងត្បូងនៅក្នុងដំណើរការទាក់ទងនឹង G20 នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
មុននេះ យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក ក្រសួងទំនាក់ទំនងអន្តរជាតិ និងសហប្រតិបត្តិការរបស់អាហ្វ្រិកខាងត្បូងបានផ្ញើ “កំណត់ចំណាំដោយពាក្យសំដី” កាលពីថ្ងៃពុធទៅកាន់ស្ថានទូត និងគណៈកម្មការជាន់ខ្ពស់នៃប្រទេស G20 ដែលបានឲ្យដឹងថា សហរដ្ឋអាមេរិក បានជូនដំណឹងដល់អាហ្វ្រិកខាងត្បូងថា ខ្លួននឹងមិនត្រូវបានអញ្ជើញឱ្យចូលរួមក្នុងសកម្មភាព G20 ណាមួយក្នុងអំឡុងពេលប្រធានាធិបតីអាមេរិកនោះទេ រួមទាំង ក្រុមការងារ កិច្ចប្រជុំរដ្ឋមន្ត្រី និងកិច្ចប្រជុំកំពូលរបស់មេដឹកនាំ៕
ប្រែសម្រួល ឈូក បូរ៉ា
