សភាអាមេរិក បរាជ័យក្នុងការរារាំងលោក Donald Trump ចាត់វិធានការយោធា ប្រឆាំងនឹងប្រទេស វ៉េណេស៊ុយអេឡា
បរទេស ៖ សភាតំណាងរាស្រ្តអាមេរិក បានបោះឆ្នោត ដើម្បីរារាំងកិច្ចខិតខំប្រឹងប្រែង ដើម្បីទប់ទល់នឹងសកម្មភាពយោធា របស់ប្រធានាធិបតី Donald Trump ប្រឆាំងនឹងប្រទេស វេណេហ្ស៊ុយអេឡា ដោយបានច្រានចោលដំណោះស្រាយ ដែលដឹកនាំដោយគណបក្ស ប្រជាធិបតេយ្យចំនួនពីរ ដែលព្យាយាមកំណត់ ការប្រើប្រាស់កម្លាំងរបស់រដ្ឋបាល។
យោងតាមសារព័ត៌មាន RT ចេញផ្សាយ នៅថ្ងៃទី១៨ ខែធ្នូ ឆ្នាំ២០២៥ បានឱ្យដឹងថា វិធានការនេះត្រូវបានដាក់ ឱ្យប្រើក្រោមដំណោះស្រាយ អំណាចសង្គ្រាម ដែលអនុញ្ញាត ឱ្យសមាជិកសភាប្រជែង នឹងប្រតិបត្តិការយោធា ដែលមិនត្រូវបានអនុម័តជាផ្លូវការ ដោយសភានោះទេ។
សំណើដំបូងបានស្វែងរកការបញ្ឈប់ការវាយប្រហារ របស់សហរដ្ឋអាមេរិក ដែលកំពុងបន្តប្រឆាំងនឹងអ្វីដែលរដ្ឋបាល Trump បានកំណត់ថា ជានាវា ដែលជាប់ទាក់ទងនឹងក្រុមជួញដូរឬ “អ្នកជួញដូរគ្រឿងញៀន” ដែលប្រតិបត្តិការនៅសមុទ្រ ការាបៀន។ ដំណោះស្រាយនេះបានបរាជ័យដោយការបោះឆ្នោតដោយសំឡេង 210-216 ដោយខ្វះសំឡេងភាគច្រើន ទោះបីជាមានការគាំទ្រពីគណបក្សប្រជាធិបតេយ្យ ជិតនឹងរួបរួម និងមួយចំនួនតូចនៃគណបក្សសាធារណរដ្ឋ។
ដំណោះស្រាយទីពីរ ដែលមានគោលបំណងទប់ស្កាត់ សកម្មភាពយោធាថ្មីណាមួយ “នៅក្នុង ឬប្រឆាំងនឹងវេណេស៊ុយអេឡា” លុះត្រាតែសភាបានប្រកាសសង្រ្គាម ឬអនុញ្ញាត ប្រតិបត្តិការបែបនេះ ក៏ត្រូវបានច្រានចោលយ៉ាងចង្អៀត នៅក្នុងការបោះឆ្នោត ដោយសំឡេង 211-213 ។
ការបោះឆ្នោតនេះបានធ្វើឱ្យប្រធានាធិបតី Trump មានសេរីភាពក្នុងការបន្តការវាយប្រហារ ដោយយោធាអាមេរិកនៅសមុទ្រ និងដើម្បីបន្តសកម្មភាព អនុវត្តច្បាប់ផ្សេងទៀត ដែលទាក់ទងនឹងយុទ្ធនាការ ដាក់សម្ពាធរបស់លោកប្រឆាំងនឹងការ៉ាកាស រួមទាំងវិធានការដែលទាក់ ទងនឹងការបិទផ្លូវរបស់ទីក្រុងវ៉ាស៊ីនតោន លើការដឹកជញ្ជូនប្រេង នៅវេណេស៊ុយអេឡា៕
