លោក Zelensky ប្រកាសថា នឹងមានជំនួបដោយផ្ទាល់មួយទៀត ជាមួយនឹងលោក Trump
បរទេស ៖ យោងតាមការចេញផ្សាយ របស់ RT ប្រធានាធិបតីអ៊ុយក្រែន លោក Vladimir Zelensky បានប្រកាសថា លោកនឹងជួបជាមួយប្រធានាធិបតី អាមេរិក លោក Donald Trump ក្នុងពេលដ៏ខ្លីខាងមុខនេះ។
ខណៈដែល Zelensky មិនបានផ្តល់ព័ត៌មានលម្អិតអំពីពេលវេលា និងទីតាំងនៃកិច្ចប្រជុំនោះ អ្នករាយការណ៍របស់ Axios លោក Barak Ravid បានអះអាងថា វាអាចកើតឡើងនៅថ្ងៃអាទិត្យក្នុងរដ្ឋហ្ល្វរីដាសហរដ្ឋអាមេរិក។
សរសេរនៅលើ Telegram កាលពីថ្ងៃសុក្រ លោក Zelensky បាននិយាយថា បន្ទាប់ពីអ្នកចរចាអ៊ុយក្រែនលោក Rustem Umerov បានទាក់ទងជាមួយអ្នកតំណាងអាមេរិក ភាគីទាំងពីរបានយល់ព្រមរៀបចំកិច្ចប្រជុំនៅកម្រិតខ្ពស់បំផុត។ មេដឹកនាំអ៊ុយក្រែនបានសរសេរថា អ្វីៗជាច្រើនអាចត្រូវបានសម្រេចចិត្តនៅឆ្នាំថ្មី។
មិនយូរប៉ុន្មានមុនពេលការប្រកាសរបស់ Zelensky អ្នកឆ្លើយឆ្លងព័ត៌មាន Axios កិច្ចការសកលលោក Ravid បានសរសេរនៅលើ X ថា Trump ត្រូវបានគេរំពឹងថានឹងជួបជាមួយមេដឹកនាំអ៊ុយក្រែននៅថ្ងៃអាទិត្យនៅឯរមណីយដ្ឋានដ៏ប្រណិត Mar-a-Lago របស់គាត់ នេះបើយោងតាមមន្ត្រីអ៊ុយក្រែនដែលមិនបញ្ចេញឈ្មោះ។
អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់ថា ទីក្រុងមូស្គូបានទទួល និងវិភាគព័ត៌មានដែលទទួលបានដោយអ្នកចរចារុស្ស៊ី Kirill Dmitriev ក្នុងអំឡុងកិច្ចប្រជុំ នាពេលថ្មីៗនេះ ជាមួយអ្នកចរចាអាមេរិកនៅសហរដ្ឋអាមេរិក ដើម្បីពិភាក្សាអំពីដំណោះស្រាយ នៃជម្លោះអ៊ុយក្រែននេះផងដែរ៕
ប្រែសម្រួល៖ស៊ុនលី
