ក្រុមប្រឹក្សាសន្តិសុខ អង្គការសហប្រជាជាតិ គ្រោងនឹងជួបប្រជុំគ្នានៅថ្ងៃចន្ទ បន្ទាប់ពីអាមេរិកវាយប្រហារ ប្រទេសវេណេស៊ុយអេឡា
បរទេស: ក្រុមប្រឹក្សាសន្តិសុខ អង្គការសហប្រជាជាតិ គ្រោងនឹងជួបប្រជុំគ្នានៅថ្ងៃចន្ទ បន្ទាប់ពីសហរដ្ឋអាមេរិក បានវាយប្រហារប្រទេស វេណេស៊ុយអេឡា និងទម្លាក់ប្រធានាធិបតីផ្តាច់ការគឺលោក Nicolas Maduro ដែលជាចលនាមួយ ដែលអគ្គលេខាធិការអង្គការសហប្រជាជាតិ លោក Antonio Guterres ចាត់ទុកថា ជាការបង្កើត “គំរូដ៏គ្រោះថ្នាក់” ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៤ ខែមករា ឆ្នាំ២០២៦ បានឲ្យដឹងថា អ្នកការទូត បាននិយាយថា ប្រទេសកូឡុំប៊ី ដែលគាំទ្រដោយប្រទេសរុស្ស៊ី និងចិន បានស្នើសុំកិច្ចប្រជុំក្រុមប្រឹក្សា ដែលមានសមាជិក ១៥រូប ។ ក្រុមប្រឹក្សាសន្តិសុខអង្គការ សហប្រជាជាតិ បានជួបប្រជុំពីរដង គឺក្នុងខែតុលា និងខែធ្នូ ជុំវិញភាពតានតឹងកាន់តែខ្លាំងឡើង រវាងសហរដ្ឋអាមេរិក និងប្រទេសវេណេស៊ុយអេឡា ។
ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសៅរ៍ថា ទីក្រុងវ៉ាស៊ីនតោននឹងគ្រប់គ្រងប្រទេសវេណេស៊ុយអេឡា “រហូតដល់ពេល ដែលយើងអាចធ្វើការផ្លាស់ប្តូរដោយសុវត្ថិភាព ត្រឹមត្រូវ និងយុត្តិធម៌”។
គេមិនច្បាស់ទេថាតើលោក Trump មានគម្រោងត្រួតពិនិត្យប្រទេស វេណេស៊ុយអេឡាយ៉ាងដូចម្តេចនោះទេ៕
ប្រែសម្រួល: ណៃ តុលា
