ផ្ទះរបស់អនុប្រធានាធិបតីអាមេរិក លោក JD Vance នៅរដ្ឋ Ohio ត្រូវគេវាយប្រហារ
បរទេស៖ អនុប្រធានាធិបតីអាមេរិក លោក JD Vance កាលពីថ្ងៃចន្ទ បានបញ្ជាក់ថា ផ្ទះរបស់លោកនៅទីក្រុង Midwestern នៃរដ្ឋ Ohio ត្រូវបានវាយប្រហារ ដោយកត់សម្គាល់ថា លោកមិននៅផ្ទះនោះទេនៅពេលឧបទ្ទវហេតុបានកើតឡើង។
យោងតាមទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃទី៦ ខែមករា ឆ្នាំ២០២៦ បានឱ្យដឹងថា លោក Vance បានសរសេរនៅលើ X ថា “តាមដែលខ្ញុំអាចប្រាប់បាន មនុស្សឆ្កួតម្នាក់បានព្យាយាមទម្លាយចូលបង្អួចដោយញញួរ។ ខ្ញុំដឹងគុណចំពោះសេវាកម្មសម្ងាត់ និងប៉ូលីស Cincinnati ដែលបានឆ្លើយតបយ៉ាងឆាប់រហ័ស” ។
យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា ភ្នាក់ងារសេវាសម្ងាត់បានឃាត់ខ្លួនជនសង្ស័យម្នាក់ភ្លាមៗនៅពាក់កណ្តាលអធ្រាត្រ ហើយមន្ត្រីអនុវត្តច្បាប់បានកំណត់អត្តសញ្ញាណជនសង្ស័យថា ឈ្មោះ William DeFoor អាយុ ២៦ ឆ្នាំ ។
ការវាយប្រហារនេះគឺជាឧប្បត្តិហេតុចុងក្រោយបង្អស់នៃអំពើហឹង្សាប្រឆាំងនឹងមេដឹកនាំនយោបាយរបស់សហរដ្ឋអាមេរិកក្នុងរយៈពេលប៉ុន្មានខែថ្មីៗនេះ។
កាលពីឆ្នាំមុន ក្នុងខែកញ្ញា សកម្មជននយោបាយអាយុ ៣១ឆ្នាំ Charlie Kirk ត្រូវបានគេសម្លាប់ ខណៈកំពុងនិយាយនៅសាកលវិទ្យាល័យ Utah Valley។
សមាជិកសភាពីររូបក្នុងរដ្ឋ Minnesota ត្រូវបានបាញ់ប្រហារកាលពីខែមិថុនា បណ្តាលឲ្យមនុស្សម្នាក់ស្លាប់ និងម្នាក់ទៀតរងរបួសយ៉ាងធ្ងន់ធ្ងរ។ នៅក្នុងខែមេសា លំនៅដ្ឋានរបស់អភិបាលរដ្ឋ Pennsylvania លោក Josh Shapiro ត្រូវបានដុតបំផ្លាញ៕
ប្រែសម្រួលៈ ណៃ តុលា
