បារាំងអាចបញ្ជូនទាហានជាច្រើនពាន់នាក់ ទៅកាន់អ៊ុយក្រែន បន្ទាប់ពីបទឈប់បាញ់
ប៉ារីស៖ ប្រធានាធិបតីបារាំង លោក អេម៉ានុយអែល ម៉ាក្រុង បានឧ្យដឹងថា ទាហានបារាំង «ជាច្រើនពាន់នាក់» អាចត្រូវបានដាក់ពង្រាយ ដើម្បីរក្សាសន្តិភាពនៅក្នុងប្រទេសអ៊ុយក្រែន បន្ទាប់ពីបទឈប់បាញ់។
នៅក្នុងបទសម្ភាសន៍ជាមួយប៉ុស្តិ៍ទូរទស្សន៍ France 2 ក្នុងអំឡុងពេលកិច្ចប្រជុំនៅទីក្រុងប៉ារីស នៃប្រទេសលោកខាងលិច និងអឺរ៉ុប លោក ម៉ាក្រុង បានលេីកឡេីងថា «បារាំងនឹងចូលរួមក្នុងប្រតិបត្តិការ» ដើម្បីត្រួតពិនិត្យព្រំដែនរុស្ស៊ី-អ៊ុយក្រែន បន្ទាប់ពីកិច្ចព្រមព្រៀងឈប់បាញ់ត្រូវបានចុះហត្ថលេខា។
ទោះជាយ៉ាងណាក៏ដោយ លោកបានសង្កត់ធ្ងន់ថា ទាហានបារាំង នឹងមិនមែនជាកងកម្លាំងប្រយុទ្ធនោះទេ ដោយបន្ថែមថា បារាំងនឹងចូលរួមក្នុង «ការបង្កើតឡើងវិញនូវកងទ័ពអ៊ុយក្រែន»។
លោកបានបន្ថែមថា «ការងារត្រូវបានអនុវត្តរវាងអ៊ុយក្រែន សម្ព័ន្ធមិត្តនៃឆន្ទៈ និងអាមេរិក។ ពួកគេនឹងក្លាយជាអ្នកទទួលខុសត្រូវក្នុងការកំណត់ថាតើតំបន់ព្រំដែនត្រូវបានរំលោភបំពាន ឬអត់»។
សម្ព័ន្ធភាពមួយដែលមានប្រទេសលោកខាងលិច និងអឺរ៉ុបប្រហែល ៣០ បានឯកភាពគ្នានៅថ្ងៃអង្គារនៅឯកិច្ចប្រជុំមួយនៅទីក្រុងប៉ារីសថា ការដោះស្រាយសន្តិភាពនាពេលអនាគតណាមួយត្រូវតែរួមបញ្ចូលការធានាសន្តិសុខដ៏រឹងមាំសម្រាប់ប្រទេសអ៊ុយក្រែន៕
ប្រែសម្រួល ឈូក បូរ៉ា
