ក្រុមប្រដាប់អាវុធនៅរដ្ឋ ការ៉ែន ប្រកាសឯករាជ្យពី មីយ៉ាន់ម៉ា ហើយប្រធានាធិបតី ឈ្មោះ Nerdah Mya
បរទេស: កងទ័ពកាវធូឡៃ (KTLA) ដែលជាក្រុមបំបែកខ្លួន របស់សហភាពជាតិការ៉ែន (KNU) នៅក្នុងប្រទេសមីយ៉ាន់ម៉ា បានបញ្ជាក់ថា ខ្លួនបានបង្កើតសាធារណរដ្ឋឯករាជ្យមួយ នៅក្នុងទឹកដីក្រោមការគ្រប់គ្រងរបស់ខ្លួន នៅក្នុងឃុំមីយ៉ាវ៉ាឌី រដ្ឋការ៉ាន កាលពីថ្ងៃចន្ទ។
យោងតាមវែបសាយ DVB ចេញផ្សាយកាលពីថ្ងៃទី៨ ខែមករា ឆ្នាំ២០២៦ បានឲ្យដឹងថា ក្រុមនេះបានបន្ថែមថា ប្រធានសេនាធិការ KTLA គឺលោក Nerdah Mya ដែលជាកូនប្រុសរបស់អតីតមេដឹកនាំ សហភាពជាតិការ៉ែន លោក Bo Mya គឺជាប្រធានាធិបតីថ្មីនៃ “សាធារណរដ្ឋកាវធូឡៃឯករាជ្យ” នៅថ្ងៃទី ៥ ខែមករា ដែលជាថ្ងៃបុណ្យឯករាជ្យការ៉ែនលើកទី ៧៨ ពីចក្រភពអង់គ្លេស។
កងទ័ពកាវធូឡៃ គឺជាកងជីវពលប្រឆាំងយោធាដែលបានបំបែកចេញពី សហភាពជាតិការ៉ែន ក្នុងឆ្នាំ ២០២២ បន្ទាប់ពីស្លាបប្រដាប់អាវុធរបស់ខ្លួន គឺកងទ័ពរំដោះជាតិការ៉ាន (KNLA) និងអង្គការការពារជាតិការ៉ាន (KNDO) បានបណ្តេញលោក Nerdah Mya ចេញពីតំណែងជាប្រធានសេនាធិការ KNDO នៅថ្ងៃទី ២០ ខែកក្កដា ឆ្នាំ ២០២២។ បីថ្ងៃមុនពេលលោកត្រូវបានបណ្តេញចេញ លោក Nerdah Mya បានបង្កើត KTLA។
ទីស្នាក់ការកណ្តាលរបស់ខ្លួនមានទីតាំងនៅភូមិស៊ូកាលី ក្នុងស្រុកមីយ៉ាវ៉ាឌី តាមបណ្តោយព្រំដែនមីយ៉ាន់ម៉ា-ថៃ ទល់មុខខេត្តតាករបស់ប្រទេសថៃ និងមានចម្ងាយ ៨១ ម៉ាយ (១៣០ គីឡូម៉ែត្រ) ភាគខាងកើតនៃរដ្ឋធានីហាប៉ាអាន របស់រដ្ឋការ៉ាន៕
ប្រែសម្រួល: ណៃ តុលា
