អ៊ីរ៉ង់បិទអ៊ិនធឺណេត ក្នុងគ្រាដែលបាតុករ កំពុងផ្ទុះការតវ៉ាកាន់តែខ្លាំង
បរទេស៖ យោងតាមការចេញផ្សាយរបស់ RT ដែលបានដកស្រង់ព័ត៌មាន ចេញពីក្រុមឃ្លាំមើលពិភពលោក NetBlocks បាននិយាយថា ការដាច់អ៊ីនធឺណិត ទូទាំងប្រទេសត្រូវបានរាយការណ៍ នៅក្នុងប្រទេសអ៊ីរ៉ង់ កាលពីថ្ងៃព្រហស្បតិ៍។
ការផ្តាច់អ៊ិនធឺណេតបែបនេះ ត្រូវបានធ្វើឡើង នៅចំពេលមានការតវ៉ាបាន និងកំពុងផ្ទុះឡើងនៅទូទាំងប្រទេស ចាប់តាំងពីចុងខែធ្នូ ដែលជំរុញ ដោយសារបញ្ហាកំណើនអតិផរណាខ្ពស់ និងវិបត្តិសេដ្ឋកិច្ចដែលស្ថិតស្ថេរ នៅក្នុងសាធារណរដ្ឋអ៊ីស្លាមដែលត្រូវបានដាក់ទណ្ឌកម្ម។យ៉ាងណាក្តីនៅមិនមានព័ត៌មានបន្ថែមអំពីការដាច់អ៊ីនធឺណិតភ្លាមៗនេះទេ។
ភាពចលាចលទូទាំងប្រទេស ដែលជាការអាក្រក់បំផុត ក្នុងប៉ុន្មានឆ្នាំចុងក្រោយនេះ បានរីករាលដាលយ៉ាងឆាប់ រហ័សទៅកាន់ទីក្រុងជាច្រើន ហើយត្រូវបានគេរាយការណ៍ថា បាននាំឱ្យមានការប៉ះទង្គិចគ្នាយ៉ាងធ្ងន់ធ្ងរជាមួយអាជ្ញាធរអ៊ីរ៉ង់ ដោយមានអ្នកតវ៉ាមួយចំនួនទាមទារឱ្យមាន របបរាជានិយមឡើងវិញ។
របាយការណ៍បាននិយាយដែរថា មនុស្សយ៉ាងហោចណាស់ ២១ នាក់ត្រូវបានសម្លាប់ក្នុងអំឡុងពេលការតវ៉ា។ ទីភ្នាក់ងារសារព័ត៌មាន Tasnim ក៏បានបង្ហោះវីដេអូ មួយពីទីក្រុង Qazvin ភាគខាងជើងនៃប្រទេស ដោយបានបង្ហាញពីការ វាយប្រហារយ៉ាងព្រៃផ្សៃទៅលើមន្ត្រីសន្តិសុខម្នាក់។
តាមប្រភពព័ត៌មាន មន្ត្រីរូបនោះមិនមានប្រដាប់អាវុធទេ ហើយគ្រាន់តែអញ្ជើញប្រជាពលរដ្ឋ ដែលមានវត្តមាននៅតាមដងផ្លូវមកតវ៉ាដោយមិនមានការប្រមាថ និងបំផ្លាញទ្រព្យសម្បត្តិសាធារណៈ ប៉ុណ្ណោះ៕
ប្រែសម្រួល៖ស៊ុនលី
