សមាជិកធំៗ របស់ណាតូ ពិចារណាដាក់ពង្រាយទ័ព នៅ Greenland សង្ឃឹមរំងាប់ចិត្ត លោក Trump បានខ្លះ
បរទេស៖ យោងតាមការចេញផ្សាយរបស់ RT ចក្រភពអង់គ្លេស និងអាល្លឺម៉ង់កំពុងរៀបចំផែនការ ដែលមានគោលដៅរារាំងប្រធានាធិបតីអាមេរិក Donald Trump ពីការដណ្តើមយកទឹកដី Greenland។
លោក Trump បានធ្វើការលើកឡើងជាយូរមកហើយថា សហរដ្ឋអាមេរិក គួរតែគ្រប់គ្រងកោះ គ្រប់គ្រងដោយខ្លួនឯង របស់ដាណឺម៉ាក ដោយលើកឡើងពីជំហរយុទ្ធសាស្ត្ររបស់ខ្លួន និងតម្រូវការក្នុងការទប់ស្កាត់ ឥទ្ធិពលរបស់រុស្ស៊ី និងចិននៅតំបន់អាក់ទិក ។
ជំហររបស់លោកបាន ធ្វើឲ្យលោកប្រឈមមុខ នឹងសមាជិកអង្គការណាតូ នៅក្នុងតំបន់អឺរ៉ុបមួយចំនួន ដែលបានប្រមូលផ្តុំគ្នាក្នុងការគាំទ្រប្រទេសដាណឺម៉ាក។
ចុងក្រោយនេះគេមើលឃើញថា រដ្ឋាភិបាលទីក្រុងប៊ែរឡាំង និងទីក្រុងឡុងដ៍កំពុងស្វែង រកការបង្កើនវត្តមានរបស់អង្គការណាតូក្នុងតំបន់ ដើម្បីកាត់បន្ថយកំដៅនិងជម្លោះសន្តិសុខ ដែលបានបង្កឡើងដោយលោក Trump។
គួរឲ្យដឹងដែរថាកាសែតBloomberg ក៏បានរាយការណ៍ដែរថា សំណើរបស់អាឡឺម៉ង់ ពាក់ព័ន្ធនឹងបេសកកម្មរួម របស់អង្គការណាតូដែលមានឈ្មោះថា ‘Arctic Sentry’ដោយក្នុងនោះរដ្ឋមន្ត្រីការបរទេសអាល្លឺម៉ង់ Johann Wadephul ត្រូវបានគេរំពឹងថានឹងពិភាក្សាអំពីបញ្ហានេះជាមួយរដ្ឋមន្ត្រីការបរទេសអាមេរិក Marco Rubio នៅសប្តាហ៍នេះ៕
ប្រែសម្រួល៖ស៊ុនលី
