ប្រធានគណៈកម្មាធិការ ការពារជាតិដាណឺម៉ាក ព្រមានប្រឆាំងនឹងសង្គ្រាម ដ៏ល្ងង់ខ្លៅបំផុត លើតំបន់ Greenland
ឡុងដ៍៖ លោក Rasmus Jarlov ប្រធានគណៈកម្មាធិការការពារជាតិដាណឺម៉ាក បានឲ្យដឹងថា ការប្រឈមមុខដាក់គ្នាខាងយោធាណាមួយលើតំបន់ Greenland នឹងជាសង្គ្រាមដ៏ល្ងង់ខ្លៅបំផុតក្នុងប្រវត្តិសាស្ត្រ។ ថ្លែងនៅក្នុងបទសម្ភាសន៍ជាមួយ Sky News លោក Jarlov បានឲ្យដឹងថា មហិច្ឆតារបស់ប្រធានាធិបតីអាមេរិក លោក ដូណាល់ ត្រាំ ក្នុងការដណ្តើម យកតំបន់ Greenland តំណាងឱ្យ “អ្នកប្រជែងសម្រាប់ការទាមទារ ដីធ្លីខុសច្បាប់បំផុត ក្នុងប្រវត្តិសាស្ត្រសម័យទំនើប”។
លោក Jarlov ក៏បានកត់សម្គាល់ផងដែរថា ទាំងរុស្ស៊ី និងចិន មិនមានសកម្មភាពណា មួយនៅក្នុងតំបន់ Greenland នោះទេ។ “ពួកគេមិនមានស្ថានកុងស៊ុលនោះទេ ។ ពួកគេមិនមានសកម្មភាពរុករករ៉ែនោះទេ ។ ពួកគេមិនមានអ្វីទេ។ ពួកគេមិននៅទីនោះទេ”។ លោក បានសង្កត់ធ្ងន់បន្ថែមទៀតថា “ពលរដ្ឋ Greenland បានបញ្ជាក់យ៉ាងច្បាស់ថា ពួកគេមិនចង់ក្លាយជាជនជាតិអាមេរិកនោះទេ ហើយពួកគេមិនមែន សម្រាប់លក់នោះទេ”។
ចាប់តាំងពីចូលកាន់តំណែងម្តងទៀតនៅ ក្នុងខែមករា ឆ្នាំ២០២៥ លោក ដូណាល់ ត្រាំ បានបង្ហាញចំណាប់អារម្មណ៍ម្តងហើយម្តងទៀត ក្នុងការទទួលបានការគ្រប់គ្រងតំបន់ Greenland ដោយ ថា លោកនឹងមិនច្រានចោលការប្រើប្រាស់ “ការបង្ខិតបង្ខំយោធា ឬសេដ្ឋកិច្ច” ដើម្បីសម្រេចគោលដៅនោះទេ ។
គួរបញ្ជាក់ថាតំបន់ Greenland ដែលជាអតីតអាណានិគមដាណឺម៉ាក បានក្លាយជាផ្នែកសំខាន់មួយនៃព្រះរាជាណាចក្រដាណឺម៉ាក ក្នុងឆ្នាំ ១៩៥៣។ វាត្រូវបានផ្តល់ការគ្រប់គ្រងផ្ទៃក្នុងក្នុងឆ្នាំ ១៩៧៩ ដោយពង្រីកស្វ័យភាពរបស់ខ្លួន ទោះបីជាដាណឺម៉ាក នៅតែមានសិទ្ធិអំណាចលើកិច្ចការបរទេស និងការពារជាតិក៏ដោយ ៕
ប្រែសម្រួល ឈូក បូរ៉ា
