អ្នកស្លាប់នៅក្នុងបាតុកម្មនៅអ៊ីរ៉ង់ កើនឡើងដល់ ៥៤៤នាក់ ខណៈដែលលោកត្រាំថា អ៊ីរ៉ង់ សុំចរចាជាមួយអាមេរិក
បរទេស៖ ប្រធានាធិបតី សហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃអាទិត្យថា អ៊ីរ៉ង់បានស្នើឱ្យមានការចរចា បន្ទាប់ពីការគំរាមកំហែង របស់លោកក្នុងការវាយប្រហារ សាធារណរដ្ឋអ៊ីស្លាមមួយនេះ ជុំវិញការបង្ក្រាបដ៏បង្ហូរឈាមរបស់ខ្លួន ដែលផ្តោតលើក្រុមបាតុករនៅទីនោះ ដែលជាចលនាមួយ ដែលបានកើតឡើង ខណៈដែលសកម្មជនបាននិយាយថា ចំនួនអ្នកស្លាប់នៅក្នុងការតវ៉ាបានកើនឡើងដល់យ៉ាងហោចណាស់ ៥៤៤ នាក់។
យោងតាមសារព័ត៌មាន AP ចេញផ្សាយនៅថ្ងៃទី១២ ខែមករា ឆ្នាំ២០២៦ បានឱ្យដឹងថា លោក ត្រាំ និងក្រុមសន្តិសុខជាតិរបស់លោក បានថ្លឹងថ្លែងពីការឆ្លើយតប ដែលអាចកើតមានជាច្រើនប្រឆាំងនឹងអ៊ីរ៉ង់ រួមទាំងការវាយប្រហារតាមអ៊ីនធឺណិត និងការវាយប្រហារ ដោយផ្ទាល់ដោយសហរដ្ឋអាមេរិក ឬអ៊ីស្រាអែល, នេះបើយោងតាមមនុស្សពីរនាក់ ដែលស្គាល់ពីការពិភាក្សាផ្ទៃក្នុងរបស់សេតវិមាន ដែលមិនត្រូវបានអនុញ្ញាត ឱ្យធ្វើអត្ថាធិប្បាយជាសាធារណៈ និងបាននិយាយក្នុងលក្ខខណ្ឌមិនបញ្ចេញឈ្មោះ។
លោក ត្រាំ បានប្រាប់អ្នកយកព័ត៌មាន កាលពីយប់ថ្ងៃអាទិត្យថា “យោធាកំពុងពិនិត្យមើលវា ហើយយើងកំពុងពិនិត្យមើលជម្រើសដ៏រឹងមាំមួយចំនួន”។ នៅពេលសួរអំពីការគំរាមកំហែង សងសឹករបស់អ៊ីរ៉ង់ លោកបាននិយាយថា “ប្រសិនបើពួកគេធ្វើបែបនោះ យើងនឹងវាយប្រហារពួកគេ ក្នុងកម្រិតដែលពួកគេមិនធ្លាប់ត្រូវបានវាយប្រហារពីមុនមក”។
ថ្លែងនៅពេលក្រោយនៅលើយន្តហោះ Air Force One លោក ត្រាំ បាននិយាយថា រដ្ឋបាលរបស់លោកកំពុងស្ថិត ក្នុងការចរចា ដើម្បីបង្កើតកិច្ចប្រជុំ ជាមួយទីក្រុង តេហេរ៉ង់ ប៉ុន្តែបានព្រមានថា លោកអាចត្រូវធ្វើសកម្មភាព ជាមុនសិន ខណៈដែលរបាយការណ៍អំពីចំនួនអ្នកស្លាប់ នៅក្នុងប្រទេសអ៊ីរ៉ង់កើនឡើង ហើយរដ្ឋាភិបាលបន្តចាប់ខ្លួនក្រុមបាតុករ ៕
ប្រែសម្រួលៈ ណៃ តុលា
