ក្រសួងយុត្តិធម៌អាមេរិក កំពុងស៊ើបអង្កេតអភិបាលរដ្ឋ Minnesota និងអភិបាលក្រុង Minneapolis ពីបទរារាំងការអនុវត្តច្បាប់សហព័ន្ធ
បរទេស៖ ទីភ្នាក់ងារព័ត៌មាន Fox News បានរាយការណ៍ កាលពីថ្ងៃសុក្រថា រដ្ឋអាជ្ញាសហព័ន្ធកំពុងស៊ើបអង្កេតលោក Tim Walz អភិបាលរដ្ឋ Minnesota និងលោក Jacob Frey អភិបាលក្រុង Minneapolis ពីបទរារាំងប្រតិបត្តិការអនុវត្តច្បាប់ សហព័ន្ធនៅក្នុងរដ្ឋ។
យោងតាមទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃទី១៧ ខែមករា ឆ្នាំ២០២៦ បានឱ្យដឹងថា លោក Todd Blanche អនុប្រធានរដ្ឋអាជ្ញាសហរដ្ឋអាមេរិក ដែលត្រូវបានដកស្រង់ សម្តីដែលបាននិយាយថា វោហាសាស្ត្ររបស់មន្ត្រី ទាំងពីររូបប្រឆាំងនឹងការអនុវត្តច្បាប់ អន្តោប្រវេសន៍ និងគយសហរដ្ឋអាមេរិក (ICE) កំពុងខិតជិត ដល់បទល្មើសសហព័ន្ធដែលអាចកើតមាន។
លោក Blanche បាននិយាយថា “នៅពេលដែលអភិបាល ឬអភិបាលក្រុងគំរាមកំហែងមន្ត្រីរបស់យើង នៅពេលដែលអភិបាលក្រុងណែនាំថា គាត់កំពុងលើកទឹកចិត្តប្រជាពលរដ្ឋឱ្យទូរស័ព្ទទៅលេខ ៩១១ នៅពេលដែលពួកគេឃើញមន្ត្រី ICE , នោះជិតដល់ឧក្រិដ្ឋកម្មសហព័ន្ធហើយ”។
របាយការណ៍នេះបាននិយាយថា ប្រភពពីរដែលដឹងបញ្ហានេះបានបញ្ជាក់ថា ការស៊ើបអង្កេតកំពុងដំណើរការ ទោះបីជាវានៅតែស្ថិតក្នុងដំណាក់កាលដំបូង ហើយវាមិនច្បាស់ថា តើវានឹងនាំឱ្យមានការចោទប្រកាន់ព្រហ្មទណ្ឌឬអត់ក៏ដោយ។ មិនមានព័ត៌មានលម្អិតបន្ថែមត្រូវបានចេញផ្សាយជាសាធារណៈទេ។
គេហទំព័រនយោបាយ របស់សហរដ្ឋអាមេរិក The Hill បានរាយការណ៍ថា ក្រសួងយុត្តិធម៌ (DOJ) កាលពីថ្ងៃសុក្របានចេញដីកាកោះហៅ អ្នកនយោបាយគណបក្សប្រជាធិបតេយ្យ ទាំងពីររូប ដោយចោទប្រកាន់ពួកគេពីបទជ្រៀតជ្រែក ជាមួយសមត្ថភាពរបស់មន្ត្រីអនុវត្តច្បាប់ សហព័ន្ធក្នុងការអនុវត្តកាតព្វកិច្ចរបស់ពួកគេ៕
ប្រែសម្រួលៈ ណៃ តុលា
