ម៉ិកស៊ិក នឹងបន្តដឹកជញ្ជូនប្រេង ទៅកាន់ប្រទេសគុយបា ជាជំនួយមនុស្សធម៌
ម៉ិកស៊ិក៖ ប្រធានាធិបតីម៉ិកស៊ិក លោកស្រី Claudia Sheinbaum បានបញ្ជាក់ជាថ្មីនូវការប្តេជ្ញាចិត្តរបស់រដ្ឋាភិបាល លោកស្រីក្នុងការគាំទ្រប្រទេសគុយបា ដោយបញ្ជាក់ថា ការដឹកជញ្ជូនប្រេងទៅកាន់កោះនេះ នឹងបន្តក្រោមគោលនយោបាយជំនួយមនុស្សធម៌ ដែលត្រូវបានរចនាឡើង ដើម្បីកែលម្អស្ថានភាព រស់នៅរបស់ប្រជាជនគុយបា ។
លោកស្រី Sheinbaum បានថ្លែងក្នុងសន្និសីទសារព័ត៌មាន ពេលព្រឹករបស់លោកស្រីថា “ប្រសិនបើម៉ិកស៊ិក អាចជួយកែលម្អស្ថានភាព សម្រាប់ប្រទេសគុយបា យើងនឹងនៅទីនោះជានិច្ច។ វាជាទំនាក់ទំនងជាមួយប្រជាជនគុយបា ក្នុងស្ថានភាពលំបាកជាច្រើន”។
លោកស្រី Sheinbaum បានកត់សម្គាល់ថា ជំនួយសម្រាប់ប្រទេស គុយបា លើសពីមនោគមវិជ្ជា ហើយជាគោលនយោបាយស្តង់ដារ របស់រដ្ឋបាលជាបន្តបន្ទាប់ នេះបេីយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
លោកស្រីបានសង្កត់ធ្ងន់ថា “ម៉ិកស៊ិកបានរក្សាទំនាក់ទំនងជាមួយប្រទេសគុយបាក្រោមរដ្ឋាភិបាលនីមួយៗ ព្រោះវាសម្រាប់ប្រជាជនគុយបា។ នៅពេលដែលមានការបិទផ្លូវខ្លាំង ប្រជាជននឹងជួបប្រទះ នឹងការលំបាក”។
លោកស្រីបានបញ្ជាក់ជាថ្មីថា ជំនួយនេះ «គឺជាបញ្ហា នៃគោលនយោបាយការបរទេសរបស់ប្រទេសម៉ិកស៊ិក ហើយឆ្លុះបញ្ចាំងពីចរិតលក្ខណៈរបស់ជនជាតិម៉ិកស៊ិក ហើយគ្មានហេតុផលណា ដែលគួរបញ្ឈប់វាឡើយ»៕
ប្រែសម្រួល ឈូក បូរ៉ា
