អាល្លឺម៉ង់ បដិសេធសំណើក្រុមប្រឹក្សាសន្តិភាពរបស់លោក ដូណាល់ ត្រាំ
ប៊ែរឡាំង៖ យោងតាមរបាយការណ៍របស់ទស្សនាវដ្តីអាល្លឺម៉ង់ Der Spiegel បានឧ្យដឹងថា អាល្លឺម៉ង់នឹងមិនចូលរួមជាមួយក្រុមប្រឹក្សាសន្តិភាព ដែលបានស្នើឡើងដោយប្រធានាធិបតីអាមេរិក លោក ដូណាល់ ត្រាំ ក្នុងទម្រង់បច្ចុប្បន្នរបស់ខ្លួននោះទេ។
ក្រសួងការបរទេសសហព័ន្ធបានឧ្យដឹងនៅក្នុងឯកសារផ្ទៃក្នុងរបស់រដ្ឋាភិបាលថា ខណៈពេលដែលទីក្រុងប៊ែរឡាំង នៅតែបើកចំហសម្រាប់ការសន្ទនាលើគំនិតផ្តួចផ្តើមសន្តិភាព ការចូលរួមជាមួយអ្វីដែលហៅថាក្រុមប្រឹក្សាសន្តិភាព ដែលស្នើឡើងដោយលោក ត្រាំ ក្នុងទម្រង់បច្ចុប្បន្នគឺមិនអាចទៅរួចទេ នេះបើយោងតាមរបាយការណ៍របស់ Der Spiegel។
ឯកសារនេះបានបញ្ជាក់ថា អាល្លឺម៉ង់ ប្តេជ្ញាពង្រឹងសណ្តាប់ធ្នាប់អន្តរជាតិជាមួយនឹងធម្មនុញ្ញអង្គការសហប្រជាជាតិជាស្នូលរបស់ខ្លួន ខណៈដែលសំណើពីសហរដ្ឋអាមេរិកត្រូវបានចាត់ទុកថាជា “សេចក្តីព្រាងប្រឆាំង” ចំពោះអង្គការសហប្រជាជាតិ។
សំណើនេះត្រូវបានគេរាយការណ៍ថាផ្តល់ឱ្យលោក ត្រាំ ក្នុងនាមជា “ប្រធាន” នូវអំណាចសម្រេចចិត្តយ៉ាងទូលំទូលាយ។ ដោយឆ្លុះបញ្ចាំងពីជំហរនេះ អធិការបតីអាល្លឺម៉ង់ លោក Friedrich Merz មិនត្រូវបានគេរំពឹងថា នឹងចូលរួមពិធីចុះហត្ថលេខាដែលបានគ្រោងទុកសម្រាប់ថ្ងៃព្រហស្បតិ៍នៅទីក្រុង Davos ទេ។
ក្រុមប្រឹក្សាសន្តិភាពដើមឡើយត្រូវបានស្នើឡើងជាផ្នែកមួយនៃផែនការសន្តិភាពចំនួន ២០ ចំណុចដែលព្រាងដោយសហរដ្ឋអាមេរិក ដែលមានគោលបំណងបញ្ចប់ជម្លោះអ៊ីស្រាអែល-ប៉ាឡេស្ទីន និងគាំទ្រដល់ការកសាងឡើងវិញនូវតំបន់ហ្គាហ្សា៕
ប្រែសម្រួល ឈូក បូរ៉ា
