ភាពតានតឹងរវាងអាមេរិក និងអ៊ីរ៉ង់ បង្កើនក្តីបារម្ភក្នុងតំបន់ ខណៈដែលទីក្រុងតេអេរ៉ង់ បង្ហាញពីឆន្ទៈ សម្រាប់ការចរចា
តេអេរ៉ង់៖ ភាពតានតឹងកាន់តែខ្លាំងឡើងរវាងអ៊ីរ៉ង់ និងសហរដ្ឋអាមេរិក បានធ្វើឱ្យមេដឹកនាំក្នុងតំបន់មានការព្រួយបារម្ភ និងបង្កឱ្យមានការអំពាវនាវជាបន្ទាន់សម្រាប់ការទូតឡើងវិញ។ ទីក្រុងតេអេរ៉ង់ នៅថ្ងៃសុក្របានបង្ហាញពីឆន្ទៈ ដែលមានលក្ខខណ្ឌក្នុងការវិលត្រឡប់ទៅកាន់តុចរចាវិញ ដើម្បីបន្ធូរបន្ថយការប្រឈមមុខដាក់គ្នាដែលកំពុងកើនឡើង។
ប្រធានាធិបតីតួកគីលោក Recep Tayyip Erdogan បានឧ្យដឹងថា ប្រទេសតួកគីត្រៀមខ្លួនជាស្រេច ដើម្បីសម្របសម្រួលការសន្ទនារវាងទីក្រុងតេអេរ៉ង់ និងទីក្រុងវ៉ាស៊ីនតោន។ នៅក្នុងការហៅទូរស័ព្ទជាមួយប្រធានាធិបតីអ៊ីរ៉ង់លោក Masoud Pezeshkian លោក Erdogan បានគូសបញ្ជាក់ពីការប្តេជ្ញាចិត្តរបស់ទីក្រុងអង់ការ៉ាចំពោះការទូតប្រកបដោយស្ថាបនា និងបានស្នើឱ្យដើរតួជាអ្នកសម្របសម្រួលក្នុងកិច្ចខិតខំប្រឹងប្រែង ដើម្បីបន្ថយវិបត្តិ។
លោក Pezeshkian បានបញ្ជាក់ជាថ្មីនូវការប្តេជ្ញាចិត្តរបស់អ៊ីរ៉ង់ចំពោះ “ការទូតដែលមានមូលដ្ឋានលើសេចក្តីថ្លៃថ្នូរ” ដោយផ្អែកលើច្បាប់អន្តរជាតិ ការគោរពគ្នាទៅវិញទៅមក និងការសន្ទនា ហើយបានបដិសេធការគំរាមកំហែង ឬការប្រើប្រាស់កម្លាំង។ នៅក្នុងសុន្ទរកថាទៅកាន់លោក Erdogan លោកបានសង្កត់ធ្ងន់ថា ការទូតដែលទទួលបានជោគជ័យអាស្រ័យលើការបោះបង់ចោលសកម្មភាពអរិភាព និងការលើកកម្ពស់សុច្ឆន្ទៈ។
នៅក្នុងការហៅទូរស័ព្ទដាច់ដោយឡែកមួយជាមួយប្រធានាធិបតីអេមីរ៉ាត លោក Sheikh Mohamed bin Zayed Al Nahyan លោក Pezeshkian បានសង្កត់ធ្ងន់ថា អ៊ីរ៉ង់ស្វែងរកការចូលរួម មិនមែនជម្លោះនោះទេ។
លោកបានលេីកឡេីងថា “អ៊ីរ៉ង់ផ្តល់អាទិភាពដល់ការការពារសន្តិសុខ និងការបង្កើតសន្តិភាព និងស្ថិរភាពយូរអង្វែងនៅក្នុងតំបន់” ខណៈពេលដែលរិះគន់មហាអំណាចលោកខាងលិច ចំពោះអ្វីដែលទីក្រុងតេអេរ៉ង់ មើលឃើញថាជាកង្វះការប្តេជ្ញាចិត្តផ្នែកការទូតពិតប្រាកដ៕
ប្រែសម្រួល ឈូក បូរ៉ា
