លោក ដូណាល់ ត្រាំ គំរាមបិទការបើកស្ពានថ្មី រវាងសហរដ្ឋអាមេរិក និងកាណាដា
វ៉ាស៊ីនតោន៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានគំរាមបិទការបើកស្ពានថ្មីមួយដែលភ្ជាប់សហរដ្ឋអាមេរិក និងកាណាដា ចំពេលមានភាពតានតឹងកើនឡើង រវាងប្រទេសជិតខាងអាមេរិកខាងជើងទាំងពីរ។
លោក ត្រាំ បានសរសេរនៅលើវេទិកាប្រព័ន្ធផ្សព្វផ្សាយសង្គមរបស់លោកថា “ខ្ញុំនឹងមិនអនុញ្ញាតឱ្យស្ពាននេះបើកទេ រហូតដល់សហរដ្ឋអាមេរិកទទួលបានសំណងពេញលេញសម្រាប់អ្វីគ្រប់យ៉ាងដែលយើងបានផ្តល់ឱ្យពួកគេ ហើយសំខាន់ជាងនេះទៅទៀត ប្រទេសកាណាដា ប្រព្រឹត្តចំពោះសហរដ្ឋអាមេរិកដោយយុត្តិធម៌ និងការគោរពដែលយើងសមនឹងទទួលបាន”។
លោក បានបន្តថា “ជាមួយនឹងអ្វីគ្រប់យ៉ាង ដែលយើងបានផ្តល់ឱ្យពួកគេ យើងគួរតែកាន់កាប់យ៉ាងហោចណាស់ ពាក់កណ្តាលនៃទ្រព្យសម្បត្តិនេះ។
ប្រាក់ចំណូលដែលបង្កើតឡើងដោយសារតែទីផ្សារសហរដ្ឋអាមេរិក នឹងមានចំនួនច្រើនលើសលប់” ដោយបន្ថែមថា លោកមានគម្រោង “ចាប់ផ្តើមការចរចា (បញ្ហាពាក់ព័ន្ធ) ភ្លាមៗ”។
ទោះបីជាលោក ត្រាំ មិនបានដាក់ឈ្មោះស្ពាននេះនៅក្នុងប្រកាសរបស់លោកក៏ដោយ លោកហាក់ដូចជាសំដៅទៅលើស្ពានអន្តរជាតិ Gordie Howe ដែលជាស្ពាន ៦គន្លងដែលតភ្ជាប់ទីក្រុង Windsor រដ្ឋ Ontario និងទីក្រុង Detroit រដ្ឋ Michigan។
ការសាងសង់ស្ពាននេះបានចាប់ផ្តើមនៅឆ្នាំ ២០១៨ ហើយវាត្រូវបានគេរំពឹងថានឹងបើកសម្ពោធនៅដើមឆ្នាំនេះ។ គម្រោងនេះ ដែលត្រូវបានប៉ាន់ប្រមាណថាមានតម្លៃ ៤.៧ពាន់លានដុល្លារអាមេរិក កំពុងត្រូវបានផ្តល់ហិរញ្ញប្បទាន និងត្រួតពិនិត្យដោយរដ្ឋាភិបាលកាណាដា នេះបើយោងតាមរបាយការណ៍របស់ ABC News៕
ប្រែសម្រួល ឈូក បូរ៉ា
