មេដឹកនាំកូរ៉េខាងជើង លើកកូនស្រីអាយុត្រឹម ១៣ឆ្នាំ ឲ្យឡើងជាប្រធានគ្រប់គ្រង ផ្នែកមីស៊ីលរបស់ប្រទេស
បរទេស៖ មេដឹកនាំកូរ៉េខាងជើង គីម ជុងអ៊ុន បានផ្តល់ឱ្យកូនស្រីតូច របស់លោកនូវតួនាទីជាអ្នកដឹកនាំនៅក្នុងរដ្ឋបាលមីស៊ីលរបស់ប្រទេសកូរ៉េខាងជើង ដែលត្រួតពិនិត្យកងកម្លាំងនុយក្លេអ៊ែររបស់ទីក្រុងព្យុងយ៉ាង, នេះបើយោងតាមប្រព័ន្ធផ្សព្វផ្សាយ កូរ៉េខាងត្បូងដែលបានដកស្រង់សម្តី មន្ត្រីជាន់ខ្ពស់រដ្ឋាភិបាលម្នាក់។
យោងតាមសារព័ត៌មាន News Week ចេញផ្សាយកាលពីថ្ងៃទី២៣ ខែកុម្ភៈ ឆ្នាំ២០២៦ថា កាលពីថ្ងៃអាទិត្យ លោកគីម ជុងអ៊ុន ត្រូវបានជ្រើសរើសឡើងវិញ ជាអគ្គលេខាធិការនៃគណបក្សពលករកូរ៉េ (WPK) ដែលកំពុងកាន់អំណាច ដែលជាតំណែងដែលគាត់បានកាន់អស់រយៈពេល ១៥ ឆ្នាំមកហើយ។
កូនស្រីរបស់លោកគីម ឈ្មោះថា ជូអេ និងជឿថា មានអាយុប្រហែល ១៣ ឆ្នាំ បានអមដំណើរមេដឹកនាំកំពូលកាន់តែខ្លាំងឡើង នៅក្នុងការបង្ហាញខ្លួនជាសាធារណៈ រួមទាំងនៅកន្លែងបាញ់សាកល្បងមីស៊ីលផងដែរ។ នេះបានជំរុញឱ្យមានការរំពឹងទុកថា នាងគឺជាមនុស្សដែលចង់ជំនួសលោកគីម ជាមេដឹកនាំកំពូល ដែលនឹងក្លាយជាការបន្សល់ទុកជាប្រវត្តិសាស្ត្រ ពីប្រពៃណីរាជវង្សដែលបានពេញចិត្តអ្នកស្នងមរតកបុរស។
ទិសដៅនាពេលអនាគតនៃរាជវង្សគីម នឹងជួយកំណត់សក្ដានុពលសន្តិសុខនៅលើឧបទ្វីបកូរ៉េ ជាកន្លែងដែលទំនាក់ទំនងរវាងទីក្រុងសេអ៊ូល និងទីក្រុងព្យុងយ៉ាងបានធ្លាក់ចុះយ៉ាងខ្លាំងក្នុងរយៈពេលប៉ុន្មានឆ្នាំថ្មីៗនេះ ចំពេលមានកម្មវិធីនុយក្លេអ៊ែរ និងមីស៊ីលផ្លោងរបស់លោក គីម ជុងអ៊ុន ដែលកំពុងពង្រីកខ្លួន និងវិធីសាស្រ្តដ៏តឹងរ៉ឹងរបស់អតីតប្រធានាធិបតីកូរ៉េខាងត្បូង លោក យូន ស៊ុកយ៉ុល៕
ប្រែសម្រួលៈ ណៃ តុលា
