កូរ៉េខាងជើងព្រមានថា ខ្លួនអាចបំផ្លាញកូរ៉េខាងត្បូងទាំងស្រុង ប្រសិនបើរងការគំរាមកំហែង ប៉ុន្តែទុកឱកាសឱ្យអាមេរិកចរចា
បរទេស៖ មេដឹកនាំកូរ៉េខាងជើង លោក គីម ជុងអ៊ុន បានអះអាងថា ប្រទេសដែលមានអាវុធនុយក្លេអ៊ែររបស់លោកអាច «បំផ្លាញកូរ៉េខាងត្បូង ទាំងស្រុង» ប្រសិនបើសន្តិសុខរបស់ខ្លួនត្រូវបានគំរាមកំហែង ដោយបានបញ្ជាក់ជាថ្មីនូវការបដិសេធរបស់លោកក្នុងការចូលរួមជាមួយទីក្រុងសេអ៊ូល, នេះបើយោងតាមប្រព័ន្ធផ្សព្វផ្សាយរដ្ឋបាននិយាយកាលពីថ្ងៃព្រហស្បតិ៍។
ទោះជាយ៉ាងណាក៏ដោយ លោកបានទុកទ្វារចំហសម្រាប់ការសន្ទនាជាមួយទីក្រុងវ៉ាស៊ីនតោន ខណៈពេលដែលលោកបានបញ្ចប់សមាជបក្សកាន់អំណាចដែលគូសបញ្ជាក់ពីគោលដៅគោលនយោបាយរបស់លោកសម្រាប់រយៈពេលប្រាំឆ្នាំខាងមុខ។
យោងតាមសារព័ត៌មាន AP ចេញផ្សាយនៅថ្ងៃទី២៦ ខែកុម្ភៈ ឆ្នាំ២០២៦ បានឱ្យដឹងថា ទីភ្នាក់ងារសារព័ត៌មានកណ្តាលរបស់កូរ៉េខាងជើងបានផ្សាយថា លោក គីម ក៏បានអំពាវនាវឱ្យមានការអភិវឌ្ឍប្រព័ន្ធអាវុធថ្មី ដើម្បីជំរុញយោធាដែលមានអាវុធនុយក្លេអ៊ែររបស់លោក រួមទាំងមីស៊ីលផ្លោងអន្តរទ្វីប ដែលអាចបាញ់ចេញពីក្រោមទឹក និងឃ្លាំងអាវុធនុយក្លេអ៊ែរយុទ្ធសាស្ត្រដែលបានពង្រីក ដូចជាកាំភ្លើងធំ និងមីស៊ីលរយៈចម្ងាយខ្លី ដែលផ្តោតលើកូរ៉េខាងត្បូង។
លោកគីម ជុងអ៊ុន បាននិយាយថា ការអភិវឌ្ឍយ៉ាងឆាប់រហ័សនៃកម្មវិធីនុយក្លេអ៊ែរ និងមីស៊ីលរបស់លោកក្នុងរយៈពេលប៉ុន្មានឆ្នាំចុងក្រោយនេះ «បានពង្រឹងជាអចិន្ត្រៃយ៍» ឋានៈរបស់ប្រទេសជារដ្ឋអាវុធនុយក្លេអ៊ែរ ហើយបានអំពាវនាវឱ្យសហរដ្ឋអាមេរិកបោះបង់ចោលអ្វីដែលលោកយល់ថា ជាគោលនយោបាយ «អរិភាព» ចំពោះកូរ៉េខាងជើង ប្រសិនបើអាមេរិកចង់បន្តការសន្ទនាដែលជាប់គាំងជាយូរមកហើយនោះ។
យ៉ាងណាក៏ដោយ ក្រសួងបង្រួបបង្រួមកូរ៉េខាងត្បូងបាននិយាយថា វាជាការសោកស្តាយដែលកូរ៉េខាងជើងបន្តកំណត់ទំនាក់ទំនងអន្តរកូរ៉េថាជាអរិភាព ហើយទីក្រុងសេអ៊ូលនឹង «អត់ធ្មត់» បន្តកិច្ចខិតខំប្រឹងប្រែងដើម្បីស្ថិរភាពសន្តិភាព៕
ប្រែសម្រួលៈ ណៃ តុលា
