អាមេរិក ស្នើសុំឱ្យអ៊ុយក្រែន ជួយទប់ទល់នឹងយន្តហោះ គ្មានមនុស្សបើក Shahed របស់អ៊ីរ៉ង់
បរទេស៖ ប្រធានាធិបតីអ៊ុយក្រែន លោក Volodymyr Zelensky បាននិយាយកាលពីថ្ងៃទី ៥ ខែមីនាថា អ៊ុយក្រែននឹងផ្តល់ឲ្យសហរដ្ឋអាមេរិកនូវ «ធនធានចាំបាច់» ដើម្បីជួយទប់ទល់នឹងយន្តហោះគ្មានមនុស្សបើក Shahed របស់អ៊ីរ៉ង់ ខណៈដែលសង្គ្រាម រវាងសហរដ្ឋអាមេរិក និងអ៊ីស្រាអែលជាមួយអ៊ីរ៉ង់ បានចូលដល់ថ្ងៃទីប្រាំមួយ។
យោងតាមសារព័ត៌មាន The Kyiv Independent ចេញផ្សាយ កាលពីថ្ងៃទី៥ ខែមីនា ឆ្នាំ២០២៦ថា លោក Zelensky បាននិយាយនៅក្នុង សាររបស់លោកនៅលើ Telegram ថា «យើងបានទទួលសំណើពីសហរដ្ឋអាមេរិក សម្រាប់ការគាំទ្រជាក់លាក់ ក្នុងការការពារប្រឆាំងនឹងយន្តហោះគ្មានមនុស្សបើក Shahed នៅមជ្ឈិមបូព៌ា»។
លោកបានបន្ថែមថា លោកបានផ្លាស់ប្តូរទៅ «ផ្តល់មធ្យោបាយចាំបាច់ និងធានាវត្តមានរបស់អ្នកឯកទេសអ៊ុយក្រែនដែលអាចធានាសន្តិសុខចាំបាច់» ប៉ុន្តែលោកមិនបានផ្តល់ព័ត៌មានលម្អិតបន្ថែមនោះទេ។
កាសែត Financial Times បានរាយការណ៍មុននេះ នៅថ្ងៃទី៥ ខែមីនា ដោយដកស្រង់តួលេខឧស្សាហកម្មអ៊ុយក្រែនថា មន្ទីរបញ្ចកោណ និងយ៉ាងហោចណាស់រដ្ឋមួយឈូងសមុទ្រ Gulf កំពុងធ្វើការចរចា ដើម្បីទិញឧបករណ៍ ស្ទាក់ចាប់ ដែលផលិតនៅអ៊ុយក្រែន ប្រឆាំងនឹងយន្តហោះ គ្មានមនុស្សបើក របស់អ៊ីរ៉ង់។ Financial Times បានបន្ថែមថា រដ្ឋនៅឈូងសមុទ្រ Gulf ត្រូវពឹងផ្អែកលើមីស៊ីល Patriot ដែលមានតម្លៃថ្លៃ ដើម្បីទប់ទល់នឹងយន្តហោះគ្មានមនុស្សបើករបស់អ៊ីរ៉ង់ ប៉ុន្តែស្តុកកំពុងថយចុះ ហើយពួកគេកំពុងសម្លឹង មើលបទពិសោធន៍ របស់អ៊ុយក្រែនជាមួយយន្តហោះគ្មានមនុស្សបើក Shahed៕
