Update: អ៊ីរ៉ង់ព្រមានអង់គ្លេស ដែលអនុញ្ញាតឲ្យអាមេរិក ប្រើប្រាស់មូលដ្ឋានយោធា ដើម្បីប្រឆាំងនឹងអ៊ីរ៉ង់
បរទេស៖ នៅក្នុងការសន្ទនាតាមទូរស័ព្ទជាមួយរដ្ឋមន្រ្តីការបរទេសអង់គ្លេស លោកស្រី Yvette Cooper , រដ្ឋមន្ត្រីការបរទេសអ៊ីរ៉ង់លោក Seyyed Abbas Araghchi បានព្រមានចក្រភពអង់គ្លេសថា ខ្លួនចាត់ទុកជម្រើសរបស់អង់គ្លេសក្នុងការអនុញ្ញាតឱ្យសហរដ្ឋអាមេរិកប្រើប្រាស់មូលដ្ឋានទ័ពអង់គ្លេសថាជា “ការចូលរួមក្នុងការឈ្លានពាន” ។
យោងតាមសារព័ត៌មាន BBC ចេញផ្សាយនៅថ្ងៃទី២០ ខែមីនា ឆ្នាំ២០២៦ថា នៅក្នុងកំណត់ហេតុរបស់លោកអំពីការ ហៅទូរស័ព្ទជាមួយរដ្ឋមន្ត្រី ការបរទេស ចក្រភពអង់គ្លេស លោក Seyyed Abbas Araghchi បាននិយាយថា លោកក៏បានរិះគន់វិធីសាស្រ្ត “អវិជ្ជមាន និងលំអៀង” របស់ចក្រភពអង់គ្លេស ហើយបានទាមទារឱ្យចក្រភពអង់គ្លេស បញ្ឈប់កិច្ចសហប្រតិបត្តិការណាមួយជាមួយសហរដ្ឋអាមេរិក។
ចក្រភពអង់គ្លេសមិនបានអនុញ្ញាត ឱ្យសហរដ្ឋអាមេរិកប្រើប្រាស់មូលដ្ឋានទ័ពរបស់ខ្លួន សម្រាប់ការវាយប្រហារដំបូងប្រឆាំងនឹងអ៊ីរ៉ង់ទេ ប៉ុន្តែក្រោយមកបានផ្តល់ការអនុញ្ញាត ឱ្យពួកគេប្រើប្រាស់សម្រាប់សកម្មភាពការពារប្រឆាំង នឹងការវាយប្រហារដោយមីស៊ីលរបស់អ៊ីរ៉ង់។
ក្រសួងការបរទេសបាននិយាយថា លោក Cooper បានថ្កោលទោស “ការវាយប្រហារដោយមិនប្រុងប្រយ័ត្ន” របស់អ៊ីរ៉ង់ និង “ការរំខាន និងការបិទច្រកសមុទ្រ Hormuz” របស់ខ្លួន។
