ចិន ព្រមានហ្វីលីពីនឱ្យបញ្ឈប់ការរំលោភបំពាន និងការញុះញង់នៅសមុទ្រចិនខាងត្បូង
ក្វាងចូវ៖ អ្នកនាំពាក្យយោធាចិន បានព្រមានភាគីហ្វីលីពីន ឱ្យបញ្ឈប់ការរំលោភបំពាន និងការញុះញង់ជាបន្ទាន់ បន្ទាប់ពីយន្តហោះ C-208 របស់ហ្វីលីពីន បានឈ្លានពានដោយខុសច្បាប់ចូលទៅក្នុងដែនអាកាសលើដែនទឹកដែលនៅជាប់នឹងនាវា Meiji Jiao នៃកោះ Nansha Qundao របស់ប្រទេសចិន ដោយគ្មានការយល់ព្រមពីរដ្ឋាភិបាលចិន។
លោក Zhai Shichen អ្នកនាំពាក្យនៃបញ្ជាការដ្ឋានភាគខាងត្បូងនៃកងទ័ពរំដោះប្រជាជនចិន បានឧ្យដឹងថា កងទ័ពជើងទឹក និងកងទ័ពអាកាសនៃបញ្ជាការដ្ឋានបានតាមដាន និងត្រួតពិនិត្យយន្តហោះហ្វីលីពីន ដោយចេញការព្រមានឱ្យបណ្តេញវាចេញស្របតាមច្បាប់ និងបទប្បញ្ញត្តិ។
លោកបានលេីកឡេីងថា ទង្វើរបស់ភាគីហ្វីលីពីនបង្កើតបានជាការរំលោភយ៉ាងធ្ងន់ធ្ងរលើអធិបតេយ្យភាពរបស់ប្រទេសចិន នេះបេីយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបន្ដថា “យើងសូមព្រមានយ៉ាងម៉ឺងម៉ាត់ដល់ភាគីហ្វីលីពីន ឱ្យបញ្ឈប់ការរំលោភបំពាន និងការញុះញង់ជាបន្ទាន់ ហើយធ្វើការរួមគ្នាជាមួយចិន ដើម្បីរក្សាសន្តិភាព និងស្ថិរភាពនៅក្នុងតំបន់សមុទ្រចិនខាងត្បូង”៕
ប្រែសម្រួល ឈូក បូរ៉ា
