យន្តហោះ E-3 Sentry របស់សហរដ្ឋអាមេរិក ត្រូវបានបំផ្លាញ ក្នុងការវាយប្រហាររបស់ IRGC លើមូលដ្ឋានទ័ពអាកាស នៅអារ៉ាប៊ីសាអូឌីត
តេអេរ៉ង់៖ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានឧ្យដឹងថា ខ្លួនបានបំផ្លាញយន្តហោះ E-3 Sentry របស់សហរដ្ឋអាមេរិក ដែលបំពាក់ដោយប្រព័ន្ធព្រមាន និងគ្រប់គ្រងតាមអាកាស (AWACS) ទាំងស្រុងនៅក្នុងប្រតិបត្តិការមីស៊ីល និងយន្តហោះគ្មានមនុស្ស បើកប្រឆាំងនឹងមូលដ្ឋានទ័ព អាកាសព្រះអង្គម្ចាស់ស៊ុលតង់ នៅអារ៉ាប៊ីសាអូឌីតនាពេលថ្មីៗនេះ។
នៅក្នុងសេចក្តីថ្លែងការណ៍មួយដែលបានចេញផ្សាយ នៅលើសារព័ត៌មានផ្លូវការរបស់ខ្លួន Sepah News អង្គភាព IRGC បានឧ្យដឹងថា ប្រតិបត្តិការនេះត្រូវបានធ្វើឡើង ដោយផ្នែកអវកាសរបស់ខ្លួន។
ប្រភពបានបន្ថែមថា យន្តហោះផ្សេងទៀត នៅក្បែរនោះ ក៏បានរងការខូចខាតយ៉ាងធ្ងន់ធ្ងរ ក្នុងអំឡុងពេលវាយប្រហារផងដែរ។
គួររបញ្ជាក់ថា នៅថ្ងៃសុក្រ IRGC បានវាយប្រហារមូលដ្ឋានទ័ពអាកាសព្រះអង្គម្ចាស់ស៊ុលតង់ ដែលមានទីតាំងស្ថិតនៅចម្ងាយប្រហែល ៩៦គីឡូម៉ែត្រ (៦០ម៉ាយ) ភាគអាគ្នេយ៍នៃរដ្ឋធានីរីយ៉ាដ របស់អារ៉ាប៊ីសាអូឌីត ដោយបានបំផ្លាញយន្តហោះដឹកប្រេង KC-135 ជាច្រើនគ្រឿង និងបំផ្លាញយន្តហោះមួយគ្រឿងទាំងស្រុង។
ទន្ទឹមនឹងនេះ កងទ័ពអ៊ីរ៉ង់បានឧ្យដឹងថា ប្រព័ន្ធការពារដែនអាកាសរបស់ខ្លួនបានបាញ់ទម្លាក់យន្តហោះគ្មានមនុស្សបើក MQ-9 Reaper មួយគ្រឿង ដែលកំពុងឈ្លានពាននៅភាគខាងកើតនៃច្រកសមុទ្រហ័រមូស។
យោងតាមរបាយការណ៍ កងកម្លាំងការពារដែនអាកាស របស់ប្រទេសនេះ បានបាញ់ទម្លាក់យន្តហោះគ្មានមនុស្សបើកចំនួន ១៣៨ គ្រឿងចាប់តាំងពីការ ចាប់ផ្តើមនៃសង្គ្រាមមក៕
