ក្រសួងយុត្តិធម៌ ធ្វើសំណើជូនប្រមុខរាជរដ្ឋាភិបាល ពិនិត្យនិងសម្រេច ទូលថ្វាយព្រះមហាក្សត្រ លើកលែងនិងបន្ថយទោស ដល់ទណ្ឌិត ៩០ នាក់

ភ្នំពេញ៖ ក្រសួងយុត្តិធម៌នៅថ្ងៃទី២៩ ខែតុលានេះ បានសម្រេចធ្វើសំណើ ជូនប្រមុខរាជរដ្ឋាភិបាល ពិនិត្យនិងសម្រេច ទូលថ្វាយព្រះមហាក្សត្រ លើកលែងនិងបន្ថយទោស ដល់ទណ្ឌិត៩០ នាក់ក្នុងចំណោមទណ្ឌិតសរុប ៥១២នាក់ ដែលបានស្នើសុំ។

កិច្ចប្រជុំគណៈកម្មការជាតិ ពិនិត្យបញ្ជីស្នើសុំបន្ថូរបន្ថយទោស និងលើកលែងទោសដល់ទណ្ឌិត ក្នុងឱកាសពិធីបុណ្យអុំទូក បណ្តែតប្រទីប សំពះព្រះខែ និងអកអំបុក (តាំងតុ) ដែលប្រព្រឹត្តទៅនាថ្ងៃទី ១០~១១ និង១២ ខែវិចិ្ឆកា ឆ្នាំ ២០១៩ ខាងមុខនេះ លើសំណើសុំអនុគ្រោះទោស ដល់ទណ្ឌិតសរុប ៥១២ នាក់ (ស្រី ៥៨ នាក់) ជាលទ្ធផលអង្គប្រជុំ បានសម្រេចធ្វើសំណើគោរព ជូនប្រមុខរាជរដ្ឋាភិបាល ដើម្បីពិនិត្យ និងសម្រេចទូលថ្វាយព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុត ក្នុងការផ្តល់ការអនុគ្រោះទោស ដល់ទណ្ឌិតសរុប ៩០ នាក់ ( ស្រី ១៧ នាក់) ដែលក្នុងនោះ៖
-បន្ថយទោស៦ ខែ ចំនួន ៥៨ នាក់ (ស្រី ១៣ នាក់)
-បន្ថយទោស៩ ខែ ចំនួន ១៤ នាក់ (ស្រី ០១ នាក់)
-បន្ថយទោស១២ខែ ចំនួន ០៨ នាក់ (ស្រី ០១ នាក់)
-លើកលែងទោស ចំនួន ១០ នាក់ ( ស្រី ០២ នាក់ ) ៕